राजन तेली यांनी सिंधुदुर्ग जिल्हा मध्यवर्ती सहकारी बँकेतील घोटाळ्याचे सूत्रधार नितेश राणे असल्याचा गंभीर आरोप केला आहे.
या आरोपानंतर राजकीय वर्तुळात निलेश राणे यांनी या आरोपांना मान्यता दिली आहे का असा सवाल उपस्थित झाला आहे.
सध्या निलेश राणे यांची अधिकृत प्रतिक्रिया समोर आलेली नाही, मात्र या प्रकरणाने कोकणातील राजकारणात खळबळ माजवली आहे.
Sindhudurg News : दसऱ्याच्या मुहूर्तावर तळकोकणात मोठा राजकीय भूकंप झाला. उद्धव ठाकरे यांचे विश्वासू असणारे राजन तेली यांनी पक्षावर टीका करत शिवबंधन तोडले आणि एकनाथ शिंदे यांच्या शिवसेनेत प्रवेश केला. यावेळी आता जुन्या सहकाऱ्यांसोबत नक्कीच काम करण्याची संधी मिळेल, असे भाष्य त्यांनी केले. त्यांचे हे वक्तव्य कट्टर विरोधक असणारे खासदार नारायण राणे त्यांचे सुपूत्र पालकमंत्री नितेश राणे आणि आमदार आमदार निलेश राणे यांच्याशी मनोमिलनाच्या संदर्भात होते. मात्र शिवसेनेत प्रवेश करून चारच दिवस होत नाही तोच त्यांनी पहिलाच वार पालकमंत्री नितेश राणेंवर करत गंभीर आरोप केले. यामुळे तळकोकणात पुन्हा एकदा तेली विरुध्द राणे असा राजकीय सामना रंगण्याची शक्यता असून तेलींनी केलेले आरोप आता शिवसेना आमदार निलेश राणेंना मान्य आहेत? असा सवाल तळकोकणातील राजकीय वर्तुळात चर्चिला जात आहे.
विधानसभा निवडणुकीच्या तोंडावर ठाकरेंच्या नेतृत्वातील शिवसेनेत प्रवेश करत माजी आमदार राजन तेली यांनी उद्धव ठाकरेंचे नेतृत्व स्वीकारले होते. मात्र त्यांचा पराभव झाला आणि आता 8 महिन्यांनी त्यांनी ठाकरेंची साथ सोडत उपमुख्यमंत्री एकनाथ शिंदे यांच्या शिवसेनेत प्रवेश केला. या प्रवेशामुळे तळकोकणातील सिधुंदुर्ग जिल्ह्यातील आता तेली विरूद्ध राणे हा वाद संपेल असे बोलले जात होते.
मात्र प्रवेशानंतर अवघ्या चारच दिवसांत तेलींनी तळकोकणात धमाका उडवून देत पहिलाच वार थेट राणेंवर काढला. सिंधुदुर्ग जिल्हा मध्यवर्ती सहकारी बँकेतील घोटाळ्याचे मुख्य सुत्रधार मत्स्योद्योग व बंदरे विकास मंत्री तथा पालकमंत्री नितेश राणे असल्याचा गंभीर आरोप त्यांनी केला. त्यांच्या या आरोपांमुळे आता तळकोकणासह राज्याच्या वर्तुळात खळबळ उडाली आहे. विशेष म्हणजे बँकेच्या कथित घोटाळ्याप्रकरणी तेली यांच्यासह आठ जणांची दिल्लीतील बँक सुरक्षा व फसवणूक विभागाकडे तक्रार दाखल आहे. याचीच आता चौकशी लागणार असल्यानेच तेली यांनी आपली यातून सुटका करून घेण्यासाठी शिवसेनेत प्रवेश केल्याची चर्चा आहे. एकीकडे अशा चर्चा सुरू असतानाच तेली यांनी या प्रकरणात राणेंनाही ओढले आहे.
तेली यांनी बँकेच्या अवैध कर्ज वाटपाच्या घोटाळ्यात मुख्य सुत्रधार नितेश राणे हेच असल्याचा आरोप करताना, कर्जवाटपाची सखोल चौकशी व्हावी अशी मागणी पोलीस महासंचालकांकडे केली आहे. तसेच राणे हे बँकेचे संचालक असून त्यांनी अध्यक्ष व सीईओंवर दबाव टाकून मोठ्या रकमांचे कर्जवाटप केले. याबाबतच्या तक्रारी नाबार्डसह सहकार निबंधक व स्थानिक पोलिसांकडे करण्यात आल्या आहेत. पण त्याची दखल घेण्यात आलेली नाही, असा दावा करताना राणेंनी आपल्या स्वीय सहाय्यकाला जो मानधनावर आहे त्यालाही साडेसात कोटींचे कर्ज मिळवून दिल्याचा आरोप केला आहे.
अशा या आरोपांच्या फैरी झडत असताना आता शिवसेना आमदार तथा नितेश राणेंचे भाऊ आणि शिवसेना आमदार निलेश राणे यांना हे आरोप मान्य आहेत का? असा सवाल आता उपस्थित होत आहे. कारण नितेश राणेंवर इतके गंभीर आरोप होवून 24 तास झाले तरीही अद्याप कोणतेही प्रतिक्रिया तेलींवर अथवा नितेश राणेंवर निलेश राणेंनी दिलेली नाही.
तेली यांच्या प्रवेशावेळी शिंदे यांनी आमदार निलेश राणे यांच्याशी चर्चा केली होती. त्यांच्याशी चर्चा केल्यानंतरच तेली यांच्या प्रवेशाचा मुहूर्त ठरला होता. पण ज्या राणेंनी तेलींच्या प्रवेशाला ग्रीन सिग्नल दिला. त्याच राणेंच्याविरोधात तेली यांनी बंड केल्याचे सध्याचे तळकोकणात चित्र आहे.
या बंडामुळे स्थानिक स्वराज्य संस्थांच्या निवडणुकांच्या आधीच तळकोकणात राजकीय वातावरण चांगलेच तापले असून तळकोकणात पुन्हा तेली विरुध्द राणे असा राजकीय सामना सुरू झाला आहे. तर तेली यांच्या आरोपाप्रमाणे पोलिस महासंचालक आणि नाबार्डसह सहकार निबंधक कोणता निर्णय घेतात? तेलींच्या आरोपांनंतर आमदार निलेश राणे काय भूमिका घेतात? ते कशी प्रतिक्रिया देतात याकडे तळकोकणातील पदाधिकारी, कार्यकर्त्यांचे लक्ष लागले आहे.
प्रश्न 1: राजन तेली कोण आहेत?
👉 राजन तेली हे नुकतेच एकनाथ शिंदे यांच्या शिवसेनेत प्रवेश केलेले राजकारणी आहेत.
प्रश्न 2: कोणते आरोप केले आहेत?
👉 तेली यांनी दावा केला की सिंधुदुर्ग जिल्हा मध्यवर्ती सहकारी बँकेतील मोठ्या आर्थिक गैरव्यवहारामागे मंत्री नितेश राणे आहेत.
प्रश्न 3: निलेश राणे यांनी यावर प्रतिक्रिया दिली आहे का?
👉 आतापर्यंत निलेश राणे यांनी कोणतीही सार्वजनिक प्रतिक्रिया दिलेली नाही.
प्रश्न 4: या प्रकरणाचा महाराष्ट्रातील राजकारणावर काय परिणाम झाला?
👉 या आरोपांमुळे कोकण आणि राज्यभरात शिंदे गट, राणे बंधू आणि स्थानिक नेत्यांमध्ये मोठी खळबळ उडाली आहे.
प्रश्न 5: पुढे काय अपेक्षित आहे?
👉 तपासाची मागणी वाढू शकते आणि नितेश राणे किंवा त्यांच्या समर्थकांकडून कायदेशीर कारवाईची शक्यता आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.