आमदार दळवींवर दोन कोटींच्या खंडणीचा आरोप; रायगड जिल्ह्यात खळबळ!

रायगड : पेण तालुक्यातील भाल गावातील सुरू असलेल्या खारबंदीस्त कामात अलिबाग-मुरुडचे शिवसेना आमदार महेंद्र दळवी (Mahendra Dalvi) यांनी ठेकेदाराकडे 2 कोटींची खंडणी मागणी केल्याचा आरोप भाजपचे पेणचे आमदार रवींद्र पाटील (Ravindra patil) यांनी केला. त्याबाबतचा व्हिडीओही रायगड जिल्ह्यात व्हायरल झाला असून चर्चेला उधाण आले आहे. मात्र, संबंधित ठेकेदार प्रथमेश काकडे कन्स्ट्रक्शनच्या वतीने सुनील पाटील यांनी पत्रकार परिषद घेऊन अशी कोणतीही मागणी आमदार महेंद्र दळवी यांनी केलेली नसल्याचा खुलासा केला आहे. त्यामुळे आमदार रवींद्र पाटील यांच्या दळवींवर केलेल्या आरोपाचा बूमरॅंग झाल्याचे चित्र दिसून येत आहे. (BJP MLA accuses Shiv Sena MLA Mahendra Dalvi of ransom of Rs 2 crore)

पेण तालुक्यातील भाल येथे शेतात पाणी येऊ नये, यासाठी खारलँड विभागातर्फे खारबंदिस्त काम सुरू आहे. खारबंदीस्त काम हे प्रथमेश काकडे कन्स्ट्रक्शनतर्फे केले जात आहे. काम निकृष्ट दर्जाचे होत असल्याने ग्रामस्थांनी काम बंद केले होते. या कामाची पाहणी करण्यासाठी पेणचे भाजप आमदार रवींद्र पाटील हे घटनास्थळी गेले होते. त्यावेळी अधिकारी आणि ग्रामस्थांसमोर आमदार पाटील यांनी ठेकेदाराकडे आमदार महेंद्र दळवी यांनी 2 कोटींची मागणी केल्याचे सांगितले. पेणच्या कामात अलिबागच्या आमदाराचा हस्तक्षेप कशाला, असा सवालही त्यांनी उपस्थित केला होता.

यावेळी एका ग्रामस्थाने आमदार महेंद्र दळवी यांनी पैसे कधी मागितले, असा सवाल आमदार रवींद्र पाटील यांना विचारून जनतेची दिशाभूल करू नका, असे म्हटले आहे. आमदार रवींद्र पाटीलाच्या या व्यक्तव्याचा व्हिडीओ जिल्ह्यात व्हायरल झाल्याने चर्चेला उधाण आले आहे. या घडलेल्या प्रकाराबाबत प्रथमेश काकडे कन्स्ट्रक्शनच्या वतीने सुनील पाटील यांनी पेण येथे पत्रकार परिषद घेऊन आमदार महेंद्र दळवी किंवा कोणत्याही शिवसैनिकाने पैशाची मागणी केली नसल्याचा खुलासा केला आहे. त्यामुळे या प्रकरणावर पडदा पडला आहे.

अशा बदनामीला भीक घालत नाही : आमदार दळवी

काहीजण शिवसेनेला बदनाम करण्याचे काम करून खोटे वृत्त प्रसिद्ध करीत आहेत. शिवसेना अशा बदनामीला भीक घालत नाही, अशी प्रतिक्रिया आमदार महेंद्र दळवी यांनी दिली आहे.