BJP Ex MLA Resignation : भाजपला धक्का : अत्याचाराचा गुन्हा दाखल होताच माजी आमदाराचा सर्व पदांचा राजीनामा; प्रदेशाध्यक्षांना पत्र पाठवत केला मोठा दावा

Kalyan Crime News : कल्याण शहरातील एका २२ वर्षीय विवाहित तरुणीने भाजपचे माजी आमदार नरेंद्र पवार आणि बडतर्फ पोलिस कर्मचारी शैलेश पाटील यांच्याविरोधात लैंगिक अत्याचाराची तक्रार दिली होती. या तक्रारीनंतर पडघा पोलिसांनी गुन्हा दाखल केला आहे. या प्रकरणाने परिसरात खळबळ उडाली असतानाच माजी आमदार नरेंद्र पवार यांनी पक्षातील आपल्या सर्व पदांचा राजीनामा दिला आहे. याबाबत त्यांनी भाजपचे प्रदेशाध्यक्ष यांना पत्र पाठवत राजीनामा स्वीकारण्याची विनंती केली आहे.

कल्याण शहरातील पीडित तरुणीचा पतीसोबत वाद सुरू होता. हा वाद मिटवण्यासाठी मध्यस्थी करण्याच्या उद्देशाने माजी आमदार नरेंद्र पवार यांनी तिला आपल्या कार्यालयात बोलावले होते. तर १३ सप्टेंबर रोजी पवार आणि बडतर्फ पोलिस कर्मचारी शैलेश पाटील यांनी पीडित तरुणी भिवंडी तालुक्यातील बापगाव येथे नेले. तेथे तिला शस्त्राचा धाक दाखवत दारू पाजवून तिच्यावर लैंगिक अत्याचार केल्याचा आरोप पिडीतेने केला आहे.

दरम्यान आता कल्याण पश्चिमचे भाजपचे माजी आमदार नरेंद्र पवार यांनी पक्षातील आपल्या सर्व पदांचा राजीनामा दिला आहे. भाजपचे प्रदेशाध्यक्ष रवींद्र चव्हाण यांना पत्र पाठवत आपला राजीनामा स्वीकारण्याची विनंती त्यांनी केली आहे. नरेंद्र पवार हे भटके विमुक्त आघाडी महाराष्ट्र प्रदेश अध्यक्ष पदावरही कार्यरत होते.

त्यांच्या विरोधात सामूहिक बलात्काराचा गुन्हा दाखल झाल्यानंतर त्यांनी पक्षातील पदांचा राजीनामा दिला आहे. तसेच आपल्याविरुद्ध दाखल झालेला गुन्हा खोटा असून आपली बदनामी करण्यासाठी षडयंत्र रचण्यात आल्याचा दावा देखील नरेंद्र पवार यांनी प्रदेशाध्यक्षांना पाठवलेल्या पत्रात केला आहे.

तसेच या प्रकरणामुळे पक्षाची प्रतिमा मलीन होऊ नये, यासाठी आपण पक्षातील सर्व पदांचा राजीनामा देत असल्याचे स्पष्टीकरण त्यांनी या पत्रात दिले आहे. तर या राजीनाम्याने कल्याण परिसरात खळबळ उडाली असून आता राजकीय वर्तुळात चर्चांना उधाण आले आहे.