भास्कर जाधव चिपळूण-गुहागरमधून निवडून कसे येतात?, तेच आता बघू : दरेकरांचे चॅलेंज

कुडाळ : दिवा विझताना ज्या पद्धतीने फडफडतो, त्याच पद्धतीने आमदार भास्कर जाधव (Bhaskar Jadhav) यांची शेवटची फडफड सुरू आहे. चिपळूणच्या भास्कर जाधवांची ज्योत भारतीय जनता पक्ष विझवून टाकल्याशिवाय राहणार नाही. चिपळूण-गुहागरमधून भास्कर जाधव कसे निवडून येतात, हे आम्ही बघून घेऊ, असा इशारा भारतीय जनता पक्षाचे नेते आमदार प्रवीण दरेकर (Pravin Darekar) यांनी आमदार जाधव यांना दिला. (Let's see how Bhaskar Jadhav gets elected from Chiplun-Guhagar : Darekar)

आमदार नीतेश राणे आणि माजी खासदार नीलेश राणे यांच्या वतीने संविधान बचाव रॅलीचे आयोजन करण्यात आले होते. त्यात आमदार दरेकर बोलत होते. या वेळी सार्वजनिक बांधकाम मंत्री रवींद्र चव्हाण, आमदार प्रसाद लाड, आमदार नीतेश राणे, नीलेश राणे आदींसह भाजपचे नेते उपस्थित होते.

आमदार दरेकर म्हणाले की, आमदार वैभव नाईक यांना सपोर्ट करायला चिपळूणमधून सोंगाड्या आले होते. हे भास्कर जाधव राष्ट्रवादी काँग्रेसमधून येऊन शिवसेनेच्या निष्ठेच्या गोष्टी शिकवू लागले आहेत. त्यांनी पवारांचा आणि राष्ट्रवादीचा झेंडा खांद्यावर घेतला होता. त्याचा जाधवांना विसर पडला आहे, त्यामुळे ते आता ठाकरेसाहेब, उद्धव ठाकरे गट याबाबत येऊन लोकांना सांगत आहेत.

दिवा विझताना जसा फडफडतो. तशीच भास्कर जाधव यांची शेवटची फडफड सुरू आहे. चिपळूणच्या भास्कर जाधवांची ज्योत भारतीय जनता पक्ष विझवून टाकल्याशिवाय राहणार नाही. चिपळूण-गुहागरमधून भास्कर जाधव कसे निवडून येतात, हेच आता भाजप बघून घेईल. तुम्ही पंतप्रधान नरेंद्र मोदी, उपमुख्यमंत्री देवेंद्र फडणवीस, केंद्रीय मंत्री नारायण राणे यांच्यावर टीका करणार. भाजप आणि कोकणची जतना हे कदापि माफ करणार नाही. त्यामुळे भास्कर जाधव यांची राजकीय ज्योत विझवून टाकण्याचे काम भारतीय जनता पक्ष निश्चितपणे करेल, असे आव्हानही दरेकरी यांनी जाधवांना दिले.

भास्कर जाधव हे महत्वाचे नाहीत तर त्यांच्यासारखी प्रवृत्ती वाढणे धोक्याचे आहे. कुडाळमध्ये येऊन ते येथील वातावरण बिघडवणार असतील, नको ते अंगविक्षेप करून आमच्या नेतृत्वावर टीका करणार असतील तर आम्ही त्यांचा बंदोबस्त केल्याशिवाय राहणार नाही. आमच्या नेतृत्वावर टीका करणार असाल तर आम्हीही जशास तसे उत्तर दिले जाईल, असा इशारा प्रवीण दरेकर यांनी दिला आहे.