Maharashtra politics : ''अनेक आमदार उद्धव ठाकरेंकडे परत येण्याच्या प्रयत्नात''

Vaibhav Naik vs Narayan Rane News : शिंदे-फडणवीस सरकार स्थापन झाल्यानंतर विरोध आणि सत्ताधारी एकमेकांवर आरोप-प्रत्यारोप करत आहेत. अशातच शिवसेना (उद्धव बाळासाहेब ठाकरे) पक्षाचे आमदार वैभव नाईक (Vaibhav Naik) यांनी मोठा गोप्यस्फोट केला आहे.

माध्यमांशी संवाद साधताना वैभव नाईक म्हणाले, केंद्रीय मंत्री नारायण राणेंना (Narayan Rane) माझ्या विरोधात माझ्या मतदारसंघातून त्यांच्या मुलाला उभे करायचे आहे. मात्र, जनतेचा कौल हा उद्धव ठाकरे (Uddhav Thackeray) यांच्यासोबत आहे. त्या मुळे माझ्याबद्दल संभ्रम निर्माण करण्याचा प्रयत्न ते करत आहेत. मी नाराज आहे, मी शिंदे गटात जाणार आहे, असा संभ्रम निर्माण करण्याचा त्यांचा उद्योग सुरू आहे, असे नाईक यांनी स्पष्ट केले.

अनेक आमदार परत येण्यास तयार

जे आमदार आमच्यातून निघून गेलेत ते आमदार आमच्यात पुन्हा येण्याचा प्रयत्न करत आहेत. उद्धव ठाकरेंनी आदेश दिला तर अनेक आमदार परत येण्यास तयार आहेत. आमच्यातून गेलेल्या आमदारांना आता त्यांची खरी परिस्थिती कळत आहे. त्यांची मलिन झालेली प्रतिमा आणि उद्धव ठाकरेंचे सरकार पाडल्याबद्दल जनतेत रोष आहे. त्यामुळे हे आमदार परत यायला तयार असल्याचे वैभव नाईक यांनी म्हटले आहे.

तसेच यावेळी नाईक यांनी नारायण राणे यांच्यावर टीका केली. ते म्हणाले, नारायण राणे यांचे मंत्रिपद दोन ते तीन महिन्यात जाणार हे भाकीत नाही, ती वस्तुस्थिती आहे. राणे यांचे शिवसेनेवर टीका करण्याचे काम होते. ते काम आता संपलेले आहे, त्यामुळे त्यांचे मंत्रीपद पुढील काही महिन्यांमध्ये जाणार असल्याचा दावा नाईक यांनी केला.