Water Dispute : गणेश नाईकांचा पुन्हा संताप, 400 कोटींच्या नोटीसवरून सिडकोला सुनावले; पाण्यावर ठाम भूमिका

Navi Mumbai News : नवी मुंबईतील क्लस्टर योजना आणि यूडीसीपीआरवरून महायुतीतील वादाची ठिणगी पडलेली असतानाच आता वनमंत्री गणेश नाईक यांनी सिडकोला थेट इशारा दिला आहे. खारघर आणि परिसरासाठी नवी मुंबई महापालिकेकडे पाण्याची मागणी करत, पाणी न दिल्यास तब्बल 400 कोटी रुपयांची नोटीस बजावणाऱ्या सिडकोला नाईक यांनी चांगलेच सुनावले. 'दादागिरी कोणी करीत असेल, तर ती खपवून घेतली जाणार नाही. दादागिरी मोडून काढली जाईल,' असा इशारा त्यांनी दिला.

नवी मुंबईतील विकासकामांची पाहणी केल्यानंतर गणेश नाईक माध्यमांशी बोलत होते. सिडकोने नवी मुंबई महापालिकेकडे 57 एमएलडी पाण्याची मागणी केली होती. मात्र, पालिकेने पाणी देण्यास नकार दिल्यानंतर सिडकोने थकीत रकमेचा आधार घेत महापालिकेला 400 कोटी रुपयांची नोटीस बजावली. यावरून नाईक आक्रमक झाले.

'नवी मुंबई महापालिका दुबळ्या लोकांची नाही'

पाणी न दिल्याच्या कारणावरून अशी नोटीस काढण्याची दादागिरी कोणी करत असेल, तर ती खपवून घेतली जाणार नाही, असे नाईक यांनी स्पष्ट केले. 'अशी नोटीस काढण्याची हिंमत कोणी केली असेल, तर त्यांना नक्कीच पश्चात्ताप करावा लागेल. कायमस्वरूपी पाणी देत नाही म्हणून कुणी दादागिरी करत असेल, तर ती मोडून काढली जाईल,' असा थेट इशारा त्यांनी दिला. नवी मुंबई महापालिका ही दुबळ्या लोकांची संस्था नाही, असे सांगत नाईक यांनी सिडकोच्या भूमिकेवर नाराजी व्यक्त केली. तसेच, सिडकोला कायमस्वरूपी पाणी देणार नसल्याचेही त्यांनी स्पष्ट केले.

'माणुसकीच्या नात्याने मागणी केली तर पाणी देऊ'

मोरबे धरणाचे पाणी प्रामुख्याने नवी मुंबईतील नागरिकांसाठी असल्याचे गणेश नाईक यांनी सांगितले. मात्र, माणुसकीच्या दृष्टिकोनातून तात्पुरती मदत मागितली तर त्याचा विचार केला जाऊ शकतो, असे त्यांनी स्पष्ट केले.

एखाद्या ठिकाणी जलवाहिनी फुटली असेल किंवा पाण्याची तात्पुरती गरज निर्माण झाली असेल, तर नवी मुंबईतील नागरिकांना काही काळ थोडे कमी पाणी वापरण्याची विनंती करून अतिरिक्त पाणी देण्याचा विचार केला जाऊ शकतो. मात्र, नवी मुंबईच्या नागरिकांच्या हक्काचे पाणी कायमस्वरूपी अन्य कोणालाही देणार नाही, अशी भूमिका नाईक यांनी मांडली.