निलेश राणेंनी भाजप प्रदेशाध्यक्ष रवींद्र चव्हाणांवर गंभीर आरोप करत मोठा गौप्य स्फोट केला आहे.
भाजपवर हल्ले थांबवण्यासाठी स्वतःला पक्षप्रवेशाची ऑफर देण्यात आली होती, असा दावा त्यांनी केला.
भाऊ व पालकमंत्री नितेश राणेंनी भाजपची बाजू घेतल्याने निलेश राणेंनी त्यांनाही जोरदार सुनावलं.
Sindhudurg News : तळकोकणात भाजप आणि शिंदेंच्या शिवसेनेतील वाद विकोपाला गेल्याचे पाहायला मिळत असून पुन्हा एकदा राणे बंधुंमध्ये देखील वाद सुरू झाला आहे. मध्यंतरी एक्सवर थांबलेला वाद आता थेट सुरू झाला आहे. नुकताच आमदार निलेश राणे यांनी भाजप प्रदेशाध्यक्ष रवींद्र चव्हाण यांच्यावर पैसे वाटपासाठी बॅगा उतरल्याचा आरोप केला होता. ज्यानंतर भाजप विरूद्ध शिवसेना असा संघर्ष वाढला आहे. यावरून निलेश राणेंचा बळीचा बकरा केला जातोय. उदय सामंत, शिवसेना नेते का बोलत नाहीत ? असा सवाल पालकमंत्री नितेश राणेंनी केला. यावर आता निलेश राणेंनी पलटवार करताना, बळीचा बकरा होण्याइतपत मी दुधखुळा नाही असे म्हणत नितेश राणेंना झापलं आहे. तसेच भाजपवर होणारे माझे हल्ले रोखण्यासाठी मला पक्ष प्रवेशाची ऑफर देण्यात आली होती असाही गौप्य स्फोट निलेश राणेंनी केला आहे.
पुढच्या दोन दिवसांनी राज्यातील नगर परिषद आणि नगर पंचायतींच्या निवडणुकांसाठी मतदान होणार असून तळकोकणात मात्र त्याआधी सत्ताधारी महायुतीतील वाद चव्हाट्यावर आला आहे. शिंदेंची शिवसेना आणि भाजपमध्ये चिखलफेक सुरू झाली असून एकमेकांवर आरोप प्रत्यारोप केले जात आहे. नुकताच निलेश राणे यांनी भाजपचे पदाधिकारी विजय केंवडेकर यांच्या घरावर धाड टाकत स्टिंग ऑपरेशन केले होते. ज्यात पैशानी भरलेली बॅग सापडली होती. यावेळी त्यांनी रवींद्र चव्हाण यांच्यावर गंभीर आरोप करत या बॅगा तेच पुरवत असल्याचे म्हटले होते. ज्यानंतर त्याच्यावर भाजपकडून जोरदार टीका करण्यात आली होती.
त्यांचे बंधू कॅबिनेट मंत्री नितेश राणे त्या स्टिंग ऑपरेशनवरून संताप व्यक्त करत आम्ही राजकीय पक्षाचे सदस्य असलो तरी आमचे स्वतःचे व्यवसायदेखील आहेत. स्वतःच्या व्यवसायासाठी घरात पैसे ठेवले तर त्यात चूक काय? असा प्रश्न नितेश राणे यांनी उपस्थित केला. रवींद्र चव्हाण यांच्यावर बिनबुडाचे आरोप करून शिवसेना गलिच्छ राजकारण करीत आहे. चव्हाण केवळ प्रचारासाठी कोकणात आले होते, याचा अर्थ त्यांनी मतांसाठी पैसे आणले असा होत नाही. निलेश राणेंचा बळीचा बकरा केला जातोय. उदय सामंत, शिवसेना नेते का बोलत नाहीत ? असा सवाल त्यांनी उपस्थित केला होता.
यावर आता निलेश राणे यांनी जोरदार प्रत्युत्तर दिलं आहे. त्यांनी, बळीचा बकरा म्हणजे काय? मी एवढा दुधखुळा वाटतो तुम्हाला? कोणीतरी सांगेल आणि मी करीन का? मला जे वाटतं ते मी करतो. निवडणूक जिंकण्यासाठी काही लोक जे फालतू प्रकार करतात, ते थांबले पाहिजेत म्हणून मी हे करतोय. मला कोण काय सांगेल आणि मी ऐकून करेन का? असं अजिबात होणार नाही. माझ्याकडे बघून तुम्हाला वाटतं का की मी कोणाच्या ऐकणाऱ्यातला आहे? असा सवाल केला आहे.
याचवेळी त्यांनी, आपल्याला मागील दोन-तीन महिन्यांपर्यंत भाजपची ऑफर मिळत होती. पण मी ती स्वीकारली नाही. जेंव्हा विधानसभेला मागूनही भाजपकडून तिकीट दिलं गेलं नाही, एकाच घरात तिघे कशाला म्हणत त्यांनी डावलं. तेव्हा शिवसेनेनं मला जवळ केलं आहे. त्यामुळे मी शिंदे साहेबांना सोडणार नाही. आता आमदारकी मिळाली म्हणून भाजपमध्ये गेलो तर मला तेच काय देवही कधी माफ करणार नाहीत, असे आमदार निलेश राणे म्हणाले. तसेच आपल्याला मंत्री, मोठ्या पदाचा, सिडकोवर जाण्याचा हाव नाही. त्यात अजिबात रसही नाही, असेही निलेश राणे यांनी म्हणत भाजपची ऑफर धुडकावली आहे.
यावेळी निलेश राणेंनी फटकारल्यावरून नितेश राणेंना विचारले असता त्यांनी, भाजप नेते रवींद्र चव्हाणांबद्दल ते एकटेच बोलत असून उदय सामंत असो किंवा शिवसेनेतील एकही नेते का बोलत नाहीत. पण दुसरीकडे गुलाबराव पाटील नारायण राणेंची खिल्ली उडवतात. यामुळेच त्यांचा त्यांचा बळीचा बकरा केला जातोय असे म्हणालो. बळीचा बकरा ही काही राजकीय टीका नसून मी फक्त परिस्थितीची जाणीव करून देण्यासाठी ते शब्द वापरले होते. तर राणे कुटुंबातील प्रत्येकाचं रक्त हे भगवंच असून हे निलेशजींना व्यवस्थित माहिती आहे असेही त्यांनी म्हटलं आहे.
एकीकडे रवींद्र चव्हाण यांच्यासहव भाजपवर होणाऱ्या टीकेनंतर निलेश राणेंवर नितेश राणेंवर भाजपचे नेते टीका करताना दिसत आहे. अशावेळी राज्याचे उपमुख्यमंत्री तथा शिवसेना अध्यक्ष एकनाथ शिंदेंनी लांजामधील प्रचारसभेत आमदार निलेश राणे यांना शिवसेनेचा पूर्णपणे पाठिंबा असल्याचे जाहीर केले. निलेश राणेंनी मतदारसंघात केलेल्या विकास कामांचे कौतुक करत, पक्ष आणि उपमुख्यमंत्री म्हणून आपण त्यांच्या पाठीशी असल्याचेही शिंदे यांनी म्हटले आहे.
भाजपने त्यांना पक्षप्रवेशाची ऑफर देऊन गप्प करण्याचा प्रयत्न केला होता, असा त्यांचा आरोप आहे.
त्यांच्यावर गंभीर आरोप करत त्यांच्या कामकाजावर प्रश्नचिन्ह उपस्थित केले.
नितेश राणेंनी भाजपची बाजू घेतल्याचा आरोप करून त्यांनी त्यांच्यावर टीका केली.
राणे बंधूंचा वाद, भाजप-शिवसेना तणाव आणि आरोप-प्रत्यारोप यामुळे संघर्ष वाढला.
भाजप, शिंदे शिवसेना आणि राणे कुटुंब या तिन्ही बाजूंना या संघर्षाचा परिणाम जाणवतो.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.