Kokan Politics : तळकोकणात महायुती तुटली? स्वबळाच्या घोषणेनं राजकीय रणकंदन, स्थानिकमध्ये पहायला मिळणार “राणे वॉर”

Sindhudurg News : राज्यात रखडलेल्या स्थानिक स्वराज्य संस्थेच्या निवडणुकीचे पडघम वाजू लागले आहेत. महायुती असो किंवा महाविकास आघाडी आप आपल्या पद्धतीने मार्चे बांधणी करताना दिसत आहे. तर महायुतीचे नेते राज्यात आमचीच सत्ता येणार असून त्यासाठी महायुती म्हणून लढणार असल्याचे सांगत आहेत. मात्र तळकोकणात महायुतीचे स्थानिक नेते राज्याचे मुख्यमंत्री देवेंद्र फडणवीस, एकनाथ शिंदे आणि अजित पवार यांच्या म्हणण्याला हरताळ फासत असल्याचे आता दिसत आहे. येथे भाजप आणि शिवसेना युतीवर ठाम नसून मंत्री नितेश राणे आणि आमदार निलेश राणे यांनी स्वबळाचा नारा दिला आहे. यामुळे येथे नितेश राणे विरुद्ध निलेश राणे असा राजकीय संघर्ष येत्या स्थानिक स्वराज्य संस्थेच्या निवडणुकीत पहायला मिळण्याची शक्यता आहे.

स्थानिक स्वराज्य संस्थेच्या निवडणुकीचे पडघम आतापासूनच तळकोकणात वाजले असून सिंधुदुर्गात भाजप आणि शिंदेंच्या शिवसेनेत खटके उडण्याचे आवाज येत आहेत. येथे भाजप नेते तथा मंत्री नितेश राणे यांनी स्पष्ट शब्दात शिवसेनेशी असो किंवा राष्ट्रवादीशी युती होणार नाही असे म्हटले आहे.

त्यांनी यासाठी राज्याचे मुख्यमंत्री देवेंद्र फडणवीसांसह प्रदेशाध्यक्ष रवींद्र चव्हाण आणि इतर वरीष्ठ नेत्यांनी होकार दिल्याचे म्हटले आहे. यानंतर येथे एकनाथ शिंदे यांच्या शिवसेनेचे आमदार निलेश राणे यांनी देखील आगामी स्थानिकमध्ये फक्त शिवसेनेचाच भगवा फडकेल असे दावा करत स्वबळाचा नारा दिला आहे. यामुळे काही महिन्यांपूर्वी ट्विटर वॉरमधून एकमेकांच्या समोर ठाटलेले राणे बंधू आता स्थानिक स्वराज्य संस्थेच्या निवडणुकीत देखील एकमेकांच्या विरोधात असतील असे चित्र निर्माण झाले आहे.

आमदार निलेश राणे यांनी जिल्हा परिषद 100 टक्के शिवसेना काढणार म्हणजे काढणारच असे वक्तव्य करत युती नाकारणाऱ्या भाजपलाच इशारा दिला आहे. तर गेल्या 27 वर्षांपासून सिंधुदुर्ग जिल्हा परिषद नारायण राणे यांनी टिकवली, दर्जा मिळवून दिला. तोच दर्जा शिवसेनेच्या माध्यमातून टिकवून ठेवू. नारायण राणेंनी मला आशीर्वाद दिलाय, जा तू शिवसेना वाढव, तू या शिवसेनेचा आहेस, तिथे शिवसेनाच वाढली पाहिजे. त्यामुळे आता मी मैदानात उतरलो आहे. यामुळे येथे कोणीतरी येऊन काहीतरी आश्वासन देईल. त्यांच्या बोलण्यामध्ये येऊ नका. मी केव्हाही आतापर्यंत जिल्हा परिषदेची पायरी चढून गेलो नाही, मात्र जनतेची काम केली. यामुळे आता येणाऱ्या जिल्हा परिषद, पंचायत समिती शिवसेना 100 टक्के जिंकणार, असा दावा त्यांनी केला .

तर नितेश राणे यांनी युती करून दोघांच्या भांडणात तिसऱ्याचा लाभ का करून द्यायचा असे म्हणत महायुती आणि ठाकरेंच्या शिवसेनेला डिवचले आहे. शिवसेना आणि भाजपची स्वबळाची तयारी असून येथे स्वबळावर किंवा मैत्रीपूर्ण लढविल्या जातील. यासाठी राज्याचे मुख्यमंत्री आणि आमचे नेते देवेंद्र फडणवीस यांनी ग्रीन सिग्नल दिलेला आहे. स्वबळावर निवडणुका लढविण्याच्या मूडमध्ये येथील राजकीय पक्ष गेले आहेत.

यामुळे प्रत्येक राजकीय पक्ष स्वबळावर निवडणुका लढण्याचा तयारीला लागला आहे. जिल्ह्यामध्ये सध्यातरी दोन्ही पक्षांची तुल्यबळ ताकद आहे. यामुळे शिवसेना आणि भाजपमध्ये युती करून भांड्याला भांड आम्हाला लावायचं नाही. येथे युती करून बंडखोरीला प्रोत्साहन द्यायचे नाही. युती झाल्यास उबाठालाच निवडणूक लढविण्यासाठी उमेदवार मिळतील. जे त्यांच्याकडे नाहीत, असा दावा देखील नितेश राणे यांनी केला आहे.

तसेच ठाकरे शिवसेना असो किंवा महाविकास आघाडी यांची जिल्ह्यात उमेदवार उभे करण्याची क्षमता नाही. त्यामुळे दोन्ही पक्षांनी येथे मैत्रिपूर्ण आणि वेगवेगळे लढून निवडणुका जिंकल्या पाहिजेत. त्याच्यानंतर पुन्हा आपण एकत्र येऊ. आमची स्वबळाची तयारी असून त्यांच्याही आहे. दोन्ही पक्षांकडे 50-50 उमेदवार तयार आहेत असाही दावा मंत्री तथा भाजपचे नेते नितेश राणे यांनी केला आहे.

FAQs :

1. सिंधुदुर्गमध्ये महायुती तुटण्याचं कारण काय आहे?
भाजप आणि शिवसेनेमध्ये जागा वाटप आणि स्थानिक वर्चस्वावरून मतभेद झाल्याने युती होणार नाही.

2. नितेश राणे कोणत्या पक्षाचे आहेत?
नितेश राणे हे भाजपचे मंत्री आणि नेते आहेत.

3. निलेश राणे कोणत्या पक्षाचे प्रतिनिधित्व करतात?
निलेश राणे हे एकनाथ शिंदे यांच्या नेतृत्वाखालील शिवसेनेचे आमदार आहेत.

4. या दोघांमध्ये थेट सामना होण्याची शक्यता आहे का?
होय, स्थानिक स्वराज्य निवडणुकांमध्ये दोघांमध्ये थेट सामना होण्याची शक्यता जास्त आहे.

5. या घडामोडींचा सिंधुदुर्गच्या राजकारणावर काय परिणाम होऊ शकतो?
महायुतीचे समीकरण बदलू शकते आणि राणे बंधूंचा संघर्ष जिल्ह्याच्या राजकीय दिशा ठरवू शकतो.