Assault Case : हॉस्पिटल कर्मचाऱ्याला शिवीगाळ, मारहाण; शिंदेंच्या शिवसेनेच्या आमदार पुत्रासह पदाधिकाऱ्यांवर गुन्हा

Palghar Crime News : पुन्हा एकदा डोंबिवली सारखीच घटना पालघरमध्ये घडली असून येथे देखील सत्ताधारी शिवसेनेच्या नेत्यांची गुंडगिरी आणि दादागिरी समोर आली आहे. येथे नगरसेवक रमेश म्हात्रे यांच्या प्रमाणेच शिवसेनेच्या पदाधिकाऱ्यांनी रुग्णालयाच्या कर्मचाऱ्यांना मारहाण केली आहे. सध्या याचे व्हिडिओ सोशल मीडियावर व्हायरल होत आहेत. दरम्यान या प्रकरणात पोलिसांनी ११ जणांवर गुन्हा दाखल केला आहे. ज्यात पालघर जिल्हाप्रमुख कुंदन संखे आणि आमदार राजेंद्र गावित यांचे चिरंजीव रोहित गावित यांचा समावेश आहे.

काही महिन्यांपूर्वी नगरसेवक रमेश म्हात्रे यांनी डोंबिवलीतील एका रुग्णालयात धिंगाणा घातल डॉक्टर आणि कर्मचाऱ्यांना मारहाण केली होती. या घटनेमुळे म्हात्रे यांना राज्यातून तडीपार करण्यात आले असून सध्या ते गोव्यात आहेत. मात्र या घटनेनंतर एकनाथ शिंदेंच्या शिवसेनेवर विरोधकांनी जोरदार टीका केली होती.

हे प्रकरण अद्याप ताजे असतानाच अशाच पद्धतीने शिवसेनेच्या आमदार पुत्रासह जिल्हाप्रमुखाने रुग्णालयाच्या कर्मचाऱ्यावर हात सोडला आहे. या प्रकरणाचे व्हिडिओ सोशल मीडियावर व्हायरल होत असून पुन्हा एकदा शिंदेंची शिवसेना विरोधकांच्या रडारवर आली आहे.

याबाबत मिळालेली माहिती अशी की, पालघर येथील रिलीफ हॉस्पिटलमध्ये एका जखमी गोविंदाला उपचारासाठी आणण्यात आले होते. यावेळी त्याच्यावर रुग्णालयाचे प्रशासनाने उपचार केले. पण यानंतर वैद्यकीय बिलावरून शिवसेनेच्या पदधिकाऱ्यांनी रुग्णालयाच्या कर्मचाऱ्यांबरोबर वाद घातला. तर चिडलेल्या पदाधिकाऱ्यांनी रुग्णालयाच्या रिसेप्शनिस्टला मारहाण केली.

सुरक्षेचा प्रश्न पुन्हा ऐरणीवर

दरम्यान पुन्हा एकदा रुग्णालयातील डॉक्टर आणि कर्मचाऱ्यांच्या सुरक्षेचा प्रश्न ऐरणीवर आला आहे. डोंबिवलीतील शास्त्रीनगर रुग्णालयात 6 जुलै २०२६ रोजी नगरसेवक रमेश म्हात्रे यांनी घातलेल्या धिंगाण्यानंतर राज्यभरातील डॉक्टरांनी तीव्र संताप व्यक्त करत संप पुकारला होता. तर तीन डॉक्टरांना व वैद्यकीय स्टाफला झालेल्या मारहाणीवरून गुन्हा दाखल करत कडक पावले उचलण्याची मागणी सरकारकडे केली होती. ज्यानंतर नगरसेवक रमेश म्हात्रेला अटक झाली होती.