Mahayuti Split : महायुतीत शिंदेंच्या शिवसेनेचा करेक्ट कार्यक्रम? रवींद्र चव्हाणांनी डेडलाईन सांगितली, दादांच्या राष्ट्रवादीने थेट निर्णयच सांगितला

Raigad News : राज्यात एकीकडे स्थानिक स्वराज्य संस्थाच्या निवडणुकीच्या प्रचाराचा धुरळा उडत असतानाच कोकणात मात्र महायुतीत खटके उडताना दिसत आहेत. काहीच दिवसांपूर्वी पदाधिकारी आणि कार्यकर्त्यांच्या फोडाफोडीवरून उपमुख्यमंत्री एकनाथ शिंदे यांनी थेट दिल्लीत केंद्रीय मंत्री अमित शाह यांची भेट घेतली होती. तसेच भाजपाचे प्रदेशाध्यक्ष रविंद्र चव्हाण यांची तक्रार केली होती. तोच आता पैसे वाटपाचा आरोप करून आमदार निलेश राणे यांनी खळबळ उडवून दिली होती. या आरोपानंतर चव्हाण यांनी मला 2 तारखेपर्यंत युती टिकायची आहे' असे विधान करत राज्याच्या राजकारणाच भूकंप आणला होता. याची आजही जोरदार चर्चा सुरू असतानाच अजित पवार यांच्या राष्ट्रवादीचे प्रदेशाध्यक्ष खासदार सुनील तटकरे यांनी युतीबाबत वक्तव्य करत शिवसेनेला धक्का दिला आहे.

भाजपवर तसेच रवींद्र चव्हाण यांच्यावर होत असणाऱ्या आरोपावरून स्थानिक स्वराज्य संस्थ्या निवडणुकीदरम्यान महायुतीत धुसफूस सुरुच असल्याचे समोर आले होते. तसेच महायुतीत अलबेल असल्याचेही उघड झाले होते. यावरून नाराज असलेले प्रदेशाध्यक्ष रवींद्र चव्हाण यांनी, 'मला 2 तारखेपर्यंत युती टिकायची आहे' असे विधान करून खळबळ उडवून दिली होती. यातच आमदार निलेश राणे यांनी चव्हाणांवर थेट पैसे वाटल्याचा आरोप केला होता. ज्यावर हे खोटे असून मी नंतर यावर उत्तर देईन, असे चव्हाण यांनी म्हटले होते. चव्हाण यांच्या या विधानानंतर राजकीय वर्तुळात चर्चांणा उधाण आले असून २ तारखेनंतर काय होईल? युती टिकेल की नाही, असे तर्कवितर्क लढवले जात आहेत.

अशातच राष्ट्रवादी काँग्रेसचे प्रदेशाध्यक्ष सुनील तटकरे यांनी मोठे विधान केले आहे. तटकरे यांनी रवींद्र चव्हाण यांच्या वक्तव्यावर प्रतिक्रिया देताना, 3 डिसेंबरनंतर नेमकं काय होईल ते मला माहिती नाही मात्र काही झाले तरी राष्ट्रवादी काँग्रेस भाजप आणि देवेंद्र फडणवीस यांच्या सोबत राहिल असे म्हटले आहे. नुकताच चव्हाण यांनी 2 डिसेंबरपर्यंत मला युती टिकवायची आहे असे वक्तव्य केलं होतं. यानंतर आता तटकरेंच्या वक्तव्याने राज्यातील युतीबाबत संभ्रम निर्माण झाला आहे.

एकीकडे कोकणातील रत्नागिरी आणि सिंधुदुर्ग जिल्ह्यात भाजप आणि शिवसेनेत वाद सुरू झाला असून येथे युतीत फूट पडली आहे. सिंधुदुर्ग जिल्ह्यात तर शिवसेना-भाजप एकमेकांविरोधात लढत आहेत. अशातच रायगडमध्ये देखील महायुतीत उभी फूट पडली असून येथे राष्ट्रवादी आणि भाजप एकत्र आहेत. तर एकनाथ शिंदेंच्या शिवसेनेनं राष्ट्रवादीच्या विरोधात दंड थोपाटले आहे. येथे मंत्री भरत गोगावलेंसह आमदार महेंद्र थोरवे आणि आमदार महेंद्र दळवी सतत तटकरेंवर टीका करताना दिसत असतात.

पालकमंत्री पदाचा वादही निवळलेला नाही

अशातच आता तटकरेंनी आपण भाजपसोबत राहू असे स्पष्ट संकेत दिल्याने भविष्यात होणाऱ्या स्थानिकच्या महानगरपालिका, जिल्हा परिषदा आणि पंचायत समितींच्या निवडणुकीत महायुती तुटलेली असेल. तर भाजप आणि राष्ट्रवादीची युती दिसेल अशी शक्यता आता वर्तवली जात आहे. याच पार्श्वभूमीवर भाजपचे प्रदेशाध्यक्ष रवींद्र चव्हाण आणि आता राष्ट्रवादीचे प्रदेशाध्यक्ष सुनील तटकरे विधान करत आहेत. आता 3 डिसेंबरनंतर नेमकं काय होणार? हे पाहावं लागणार आहे.

दरम्यान महाडमध्ये पत्रकारांशी बोलताना मंत्री आदिती तटकरे यांनी देखील शिवसेना भाजपमध्ये सुरु असलेल्या वादावर भाष्य केलं आहे. त्यांनी, मी स्वतःहून कोणा सोबत वाद करायला जात नसते, कोणाच्या मतदार संघात हस्तक्षेप करायला जात नसते, माझी तशी कार्यपद्धती नाही अस स्पष्टीकरण दिल आहे. तर राज्याचे मुख्यमंत्री देवेंद्र फडणवीस उपमुख्यमंत्री अजित पवार आणि एकनाथ शिंदेचे सहकार्य मला लाभते अस सांगत विकासात्मक दृष्ट्या जिल्हा आणि तालुका पुढे नेण्याकडे आमचा कल असतो. एकमेकांवर टिका करून कोणाचा फायदा होत नाही. लोक या टीका आणि संघर्षाकडे इंटरटेंमेंट म्हणून बघत असतात असाही आदिती तटकरे म्हणाल्या आहेत.

FAQs :

1) रवींद्र चव्हाण यांनी नेमकं काय विधान केलं?
त्यांनी “मला २ डिसेंबरपर्यंत युती टिकायची आहे” असे सांगितले, ज्यामुळे वादंग निर्माण झाला.

2) सुनील तटकरे यांनी या वक्तव्यावर काय प्रतिक्रिया दिली?
त्यांनी सांगितले की “काहीही झाले तरी राष्ट्रवादी भाजप आणि फडणवीसांसोबतच राहील.”

3) यामुळे राज्यातील युतीबाबत संभ्रम का वाढला?
दोन्ही नेत्यांच्या वेगळ्या संकेतांमुळे युतीच्या स्थिरतेवर प्रश्नचिन्ह निर्माण झाले.

4) राष्ट्रवादीने भाजपचा पाठींबा कायम ठेवणार का?
तटकरे यांनी स्पष्टपणे सांगितले की हो, पाठींबा कायम राहील.

5) ३ डिसेंबरनंतर काही मोठा बदल अपेक्षित आहे का?
अधिकृत पुष्टी नसली तरी नेत्यांच्या वक्तव्यांमुळे राजकीय हालचाली होण्याची शक्यता वर्तवली जात आहे.