शिवसेनेच्या सर्वांत तरुण नगरसेविकेकडून विजयाबद्दल मतदारांना अनोखे ‘रिटर्न गिफ्ट’

दाभोळ : दापोली नगरपंचायत निवडणुकीत (nagar panchayat election) शिवाजीनगर प्रभागातून शिवसेनेच्या (shivsena) शिवानी खानविलकर या २१ वर्षीय उच्चशिक्षित तरुणीने विजय मिळवत दापोली नगरपंचायतीच्या इतिहासात सर्वात तरुण नगरसेविका होण्याचा मान पटकावला. विजयानंतर आपल्या प्रभागात मतदारांचे आभार मानताना तिने रोपांचे वाटप करून आपली ओळख मतदारांपर्यंत वर्षांनुवर्षे ठेवण्याचा प्रयत्न केला आहे. तिच्या या उपक्रमाचे सर्वत्र कौतुक होत आहे. (Shiv Sena corporator Shivani Khanwilkar distributed saplings and thanked the voters)

निवडणूक आली की, अनेक ठिकाणी मतदारांना आमिष दाखवण्यासाठी पैसे वाटप झाल्याच्या चर्चा झडत असतात. मात्र, दापोलीतील शिवाजीनगर प्रभाग याला अपवाद ठरला आहे. या ठिकाणी विजयी झालेल्या शिवसेनेच्या उमेदवार शिवानी खानविलकर हिने मतदारांचा आशीर्वाद व शुभेच्छा घेताना आपली ओळख सदैव मतदारांच्या समोर राहावी; म्हणून विविध रोपांचे वाटप केले आहे. तिच्या या उपक्रमाचे सर्वत्र कौतुक होत आहे.

आपल्याला राजकारणात रस असून समाजाची सेवा करण्याचे आपले स्वप्न आहे, असे तिने सांगितले. तसेच, भविष्यात नगराध्यक्षपद मिळाल्यास आपण दापोलीकरांच्या विकासासाठी कटिबद्ध आहोत, असे सांगत दापोली शहराचा विकास हेच आपले ध्येय असल्याचे तिने स्पष्ट केले.

निवडून येण्याचे सर्व श्रेय मतदारांना

शिवानी खानविलकर ही उच्चशिक्षित असून तिचे वडील दापोली शहरात सर्पमित्र म्हणून परिचित आहेत. ते शिवसेनेचे पूर्वीपासूनच कार्यकर्ते आहेत. शिवानी ही आजपर्यंत दापोली नगरपंचायतीच्या इतिहासातील सर्वात तरुण नगरसेविका ठरली आहे. निवडून आल्याचे सर्व श्रेय तिने आपल्या प्रभागातील मतदारांना दिले आहे. आपल्याला राजकारणात येण्यासाठी प्रोत्साहित करणाऱ्‍या आपल्या आई-वडिलांचेही तिने आभार मानले आहेत.