Councillor Disqualification : अपात्रतेचा महाभडका! 'यांचे 16, त्यांचे 23', 'बविआ' अन् भाजपमध्ये झुंज, कोर्टात रंगणार थेट रणसंग्राम

Vasai Virar Municipal Corporation : महापालिकेत सत्ता मिळवण्यासाठी राजकीय पक्ष आणि त्यांच्या नेतृत्वामध्ये, एकमेकांविरोधात राजकीय डावपेच शिगेला पोहोचले आहेत.

पालघर जिल्ह्यातील वसई-विरार महापालिकेत नगरसेवकांविरोधात अपात्रतेचा महाभडका उडाला असून, तो न्यायालयापर्यंत पोहोचला आहे. न्यायालयाने यावर पाच फेब्रुवारीला सुनावणी ठेवली असून, तिथं काय निर्णय होतो, याकडे आता राज्याचं लक्ष लागलं आहे.

वसई-विरार महापालिकेच्या निवडणुकीनंतर, आता बहुजन विकास आघाडी आणि भाजपमध्ये (BJP) नगरसेवक अपात्रतेची लढाई चांगलीच रंगली आहे. भाजपने बहुजन विकास आघाडीच्या 16 नगरसेवकांना अपात्र ठरविण्यासाठी न्यायालयात धाव घेतली आहे, तर बहुजन विकास आघाडीने भाजपच्या 23 नगरसेवकांविरोधात न्यायालयात धाव घेतली आहे.

वसई-विरार महापालिका निवडणुकीत (Municipal Election) भाजपच्या 43 नगरसेवकांपैकी 23 नगरसेवकांनी सादर केलेल्या प्रतिज्ञापत्रामध्ये गंभीर कायदेशीर दोष आढळले आहेत, असा आरोप ॲड. प्रवीण पाटील यांनी केला आहे. याबाबत वसई दिवाणी न्यायालयात रिट दाखल करण्यात आले आहे.

बहुजन विकास आघाडीच्या नगरसेवकांनी माहिती लपवून ठेवल्याप्रकरणी त्यांचे नगरसेवकपद रद्द करण्याची मागणी करणारी याचिका भाजपचे नितीन ठाकूर यांच्यासह इतर अर्जदारांनी वसईच्या दिवाणी न्यायालयात दाखल केली आहे.

बहुजन विकास आघाडीने मित्रपक्षांसोबत 71 जागा जिंकत बहुमत मिळवले आहे. यातील 16 नगरसेवकांनी उमेदवारी अर्ज दाखल करताना माहिती लपवल्याची माहिती भाजपचे पराभूत उमेदवार नितीन ठाकूर यांनी उजेडात आणली आहे. या माहितीच्या आधारे त्यांनी वसईतील न्यायालयात रिट दाखल केली आहे.

बहुजन विकास आघाडी आणि भाजपच्या या तक्रारींवर आता न्यायालयात पाच फेब्रुवारीला सुनावणी होणार आहे. न्यायालय काय निर्णय घेत, याकडे आता सर्वांचे लक्ष लागले आहे. ही अपात्रेचा महाभडका इतर राज्यातील महापालिकांमध्ये पोहोचणार असल्याचे राजकीय विश्लेषकांचा अंदाज आहे.