Assembly Session update : सत्ताधारी आमदाराचाच विरोधकांना फुल सपोर्ट; अधिवेशनात सरकारची डोकेदुखी वाढविणारा मुद्दा धरला उचलून...

Leader of Opposition Maharashtra issue : विधिमंडळाच्या हिवाळी अधिवेशनाच्या पूर्वसंध्येला विरोधकांनी एका मुद्द्यावरून सरकारला चांगलेच घेरले आहे. तो मुद्दा म्हणजे विरोधी पक्षनेतेपद. विधिमंडळाच्या इतिहासात यावेळी पहिल्यांदाच विधानसभेसह विधानपरिषदेतही विरोधी पक्षनेता असणार नाही. हे अधिवेशन विरोधी पक्षनेत्याशिवायच पार पडणार आहे. त्यावरून विरोधकांनी सरकारवर निशाणा साधला आहे.

विरोधक आक्रमक झालेले असतानाच आता सत्ताधारी आमदारही त्यांच्या मदतीसाठी धावून आला आहे. डॉ. बाबासाहेब आंबेडकर यांचे विचार सांगत या आमदाराने सरकारलाच आरसा दाखविण्याचा प्रयत्न केला आहे. त्यांनी सोशल मीडियात विरोधी पक्षाबाबत एक सूचक पोस्ट केली आहे. मात्र, त्यामध्ये त्यांनी थेट विरोधी पक्षनेत्याचा उल्लेख केलेला नाही.

राष्ट्रवादी काँग्रेस पक्षाचे विधानपरिषदेचे आमदार अमोल मिटकरी यांनी ही पोस्ट केली आहे. त्यांनी म्हटले आहे की, ‘’लोकशाही जिवंत ठेवायची असेल तर मजबूत विरोधी पक्ष आवश्यक आहे. सरकारवर नियंत्रण ठेवणारा घटक म्हणजे विरोधी पक्ष. केवळ सत्ताधारी नव्हे तर मतभिन्नता असलेले विचार लोकशाहीला बळ देतात. विरोधी पक्षाशिवाय संसद ही फक्त “मोहोर उमटवण्याची संस्था” बनते. (डॉ. बाबासाहेब आंबेडकर)’’, अशी पोस्ट अमोल मिटकरी यांनी केली आहे.

मिटकरी यांनी या पोस्टमध्ये एकप्रकारे सरकारला घरचा आहेर दिल्याची चर्चा राजकीय वर्तुळात रंगली आहे. दरम्यान, विरोधकांनी सरकारच्या चहापानावर बहिष्कार टाकत जोरदार हल्लाबोल चढविला आहे. पत्रकार परिषदेत आमदार विजय वडेट्टीवार, भास्कर जाधव, अनिल देशमुख या नेत्यांनी विविध मुद्द्यांवरून सरकारला घेरले.

भास्कर जाधव यांनी विरोधी पक्षनेतेपदावरून सरकार राजकारण करत असल्याचे सांगितले. विरोधी पक्षनेतेपद हे घटनात्मक पद आहे. ते कुठल्या परंपरेने चालत आलेले नाही. तसेच १० टक्के सदस्यसंख्या अपेक्षित असल्याची माहितीही चुकीची आहे. ज्या विरोधी पक्षाचे जास्त आमदार, त्या पक्षाचा विरोधी पक्षनेता असा नियम असल्याचेही जाधव यांनी स्पष्ट केले.