Maharashtra MLA Salary : महाराष्ट्रातील आमदारांच्या पगारात भरघोस वाढ : अर्थ खात्याकडून फाईल मंजूर; पीए, वाहनचालकांना होणार लाभ

Maharashtra MLA Salary : महाराष्ट्रातील सर्व आमदारांच्या वेतनात वाढ करण्याच्या प्रस्तावाला राज्य सरकारने मंजुरी दिली आहे. या वेतनवाढीचा थेट फायदा आमदारांचे स्वीय साहाय्यक (पीए) आणि वाहनचालकांना होणार आहे. स्वीय साहाय्यकांचे मासिक मानधन ३० हजार रुपयांवरून ४० हजार रुपये, तर वाहनचालकांचे मासिक मानधन २० हजार रुपयांवरून ३० हजार रुपये करण्यात आले आहे.

आमदारांच्या एकूण वेतनामध्येच स्वीय सहाय्यक भत्ता आणि वाहनचालक भत्ता देण्यात येतो. वाढती महागाई, मतदारसंघातील वाढलेला कामाचा ताण याचा स्वीय साहाय्यक आणि वाहन चालक यांना योग्य मोबदला मिळणे आवश्यक आहे. त्यामुळे आमदारांच्या वेतन आणि विविध भत्त्यांमध्ये सुधारणा करावी अशी मागणी सुरु होती.

या मागणीनुसार संसदीय कामकाज विभागाने संबंधित प्रस्ताव तयार करून तो अर्थ विभागाकडे पाठवला होता. आता हा प्रस्ताव मंजूर झाला असून स्वीय साहाय्यकांचे मासिक मानधन ३० हजार रुपयांवरून ४० हजार रुपये, तर वाहनचालकांचे मासिक मानधन २० हजार रुपयांवरून ३० हजार रुपये करण्यात आले आहे. या दोन्ही भत्त्यांमध्ये वाढ झाल्याने महाराष्ट्रातील आमदारांच्या भत्त्यामध्ये २० हजार रुपयांनी वाढ झाली आहे.

दरम्यान, ही वाढ एक ऑगस्टपासून लागू करण्यात आल्याची माहिती संसदीय कार्यमंत्री चंद्रकांत पाटील यांनी दिली. पाटील म्हणाले, विधिमंडळ सदस्यांचे वेतन व भत्ते अधिनियम, १९५६ मधील विद्यमान सदस्यांना त्यांचे विधिमंडळाचे प्रशासकीय कामकाज अधिक परिणामकारकपणे पार पाडण्यासाठी स्वीय साहाय्यकांची सुविधा उपलब्ध करून देण्यात येते.

सदस्यांच्या वेतन व भत्ते संयुक्त समितीच्या शिफारशीनुसार स्वीय साहाय्यकांच्या मानधनात वाढ करण्याचा प्रस्ताव विचाराधीन होता. त्यानुसार स्वीय साहाय्यक आणि वाहनचालकांच्या मानधनात वाढ करण्याचा निर्णय घेतला आहे. या निर्णयामुळे त्यांच्या कार्यालयीन कामकाजाचा महत्त्वाचा भाग सांभाळणाऱ्या स्वीय साहाय्यक आणि वाहनचालकांना वाढीव मानधन मिळणार आहे.