Maharashtra Local Body elections : अखेर महाराष्ट्रातील स्थानिक स्वराज्य संस्थांच्या निवडणुकीचा कार्यक्रम जाहीर होणार आहे. मंगळवारी सायंकाळी किंवा बुधवारी दुपारी राज्य निवडणूक आयोगाची पत्रकार परिषद नियोजित आहे. त्यादिवसापासून आचारसंहिता लागेल, अशी माहिती विश्वसनीय सूत्रांनी दिली आहे.
मिळालेल्या माहितीनुसार, एकूण तीन टप्प्यात सर्व निवडणुका पार पडण्याची शक्यता आहे. सर्वोच्च न्यायालयाच्या निर्देशांनुसार 31 जानेवारीपर्यंत निवडणुका पूर्ण होणे बंधनकारक आहे. म्हणजे तीन टप्प्यांसाठी ८५ दिवस मिळणार आहेत. राज्यातील नऊ कोटींहून अधिक मतदार या निवडणुकांमध्ये मतदानाचा हक्क बजावतील, असेही सूत्रांनी सांगितले.
राज्यातील २८९ नगरपालिका, ३२ जिल्हा परिषदा, ३३१ पंचायत समित्या आणि २९ महापालिकांची निवडणूक होणार आहे. यात नगरपालिकांच्या प्रभागांचे, नगराध्यक्षांचे आरक्षण जाहीर झाले आहे. शिवाय मतदार यादीही अंतिम झाली आहे. त्यामुळे पहिल्या टप्प्यात २८९ नगरपालिका, नगरपंचायतींच्याच निवडणुका घेण्याचे निश्चित झाले असल्याची माहिती आहे.
जिल्हा परिषद आणि पंचायत समित्यांचे आरक्षण जाहीर झाले असले तरीही मतदार यादी अद्याप अंतिम झाली नाही. त्यामुळे जिल्हा परिषद आणि पंचायत समित्यांची निवडणूक दुसऱ्या टप्प्यात होण्याची शक्यता आहे.महापालिकेच्या प्रभाग व महापौरांचे आरक्षण नोव्हेंबर महिन्यातील दुसऱ्या आठवड्यात जाहीर होणार आहे. शिवाय ६ नोव्हेंबरला मतदार यादी प्रसिद्ध होणार आहे. त्यामुळे महापालिकांचा निवडणूक कार्यक्रम तिसऱ्या टप्प्यात असणार हे निश्चित आहे.
५ किंवा ६ नोव्हेंबरला आचारसंहिता लागू होण्याची शक्यता असल्याने ३ टप्प्यांसाठी ८५ दिवस मिळणार आहेत. यात नगरपालिका निवडणुकीच्या कार्यक्रमासाठी २१ ते २५ दिवसांचा असणार आहे. तर ३२ जिल्हा परिषदा व ३३१ पंचायत समित्यांच्या निवडणुकीचा कार्यक्रम ३० ते ३५ दिवसांचा आणि २९ महापालिकांचा २५ ते ३० दिवसांचा निवडणूक कार्यक्रम असणार आहे.
सरकारी कार्यालयात निधी खर्चाची घाई -
पुढील किमान तीन महिने आचारसंहिता लागू असणार आहे. या पार्श्वभूमीवर सार्वजनिक बांधकाम, जिल्हा परिषदा, नगरपालिका, महापालिका, महसूल, जिल्हा नियोजन अधिकारी अशा सर्वच कार्यालयांची सध्या निधी खर्चाची लगबग पाहायला मिळत आहे. त्यातून दोन-तीन दिवसांत अंदाजे १५ ते २० हजार कोटींची कामे मार्गी लागू शकतात, असे सूत्रांनी सांगितले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.