Mumbai News: महाराष्ट्र राज्याच्या पोलीस महासंचालक रश्मी शुक्ला येत्या 31 डिसेंबर रोजी निवृत्त होत आहेत. शुक्ला यांच्यानंतर राज्याच्या पोलीस महासंचालकपदी कोणाची नियुक्ती केली जाणार याबाबत जोरदार चर्चा सुरू झाल्या होत्या. राज्य सरकारकडून पोलीस महासंचालकपदासाठी 7 जणांची यादी मंजुरीसाठी यूपीएससीकडे पाठवण्यात आल्याचंही समोर आलं होतं. याचनंतर आता महाराष्ट्राचे नवे डीजीपी (DGP) म्हणून वरिष्ठ आयपीएस (IPS) अधिकारी सदानंद दाते यांची निवड करण्यात आली आहे.
मुंबईतील 26/11 मुंबई दहशतवादी हल्ल्यात महत्वाची भूमिका निभावणारे सदानंत दाते यांचं नाव महाराष्ट्राचे नवे पोलिस महासंचालकपदासाठी पहिल्यापासून आघाडीवर होते. आता दाते यांच्या नावावर शिक्कामोर्तब करण्यात आलं. पोलिस महासंचालकपदाचा दातेंचा कार्यकाळ हा डिसेंबर 2027 पर्यंत असणार आहे.
राज्याचे सध्याच्या पोलीस महासंचालक रश्मी शुक्ला (Rashmi Shukla) 31 डिसेंबर 2025 रोजी सेवेतून निवृत्त होत आहेत. शुक्ला यांच्यानंतर नव्या डीजीपी पदासाठी राज्याच्या गृह विभागानं सात वरिष्ठ आयपीएस अधिकाऱ्यांची नावे केंद्रीय लोकसेवा आयोगाकडं पाठवली होती. केंद्रीय लोकसेवा आयोगाकडे पाठवण्यात आलेल्या यादीत राष्ट्रीय तपास संस्थेचे (एनआयए) प्रमुख सदानंद यांच्या नावाची जोरदार चर्चा आहे.
गृह विभागानं यूपीएससीकड पाठवलेल्या यादीत सदानंद दाते यांच्यासह लाचलुचपत प्रतिबंधक विभागाचे महासंचालक संजीव कुमार सिंगल, पोलिस महासंचालक (विधी व तांत्रिक) संजय वर्मा, पोलिस महासंचालक (पोलिस गृहनिर्माण) अर्चना त्यागी, नागरी संरक्षण दलाचे संचालक संजीव कुमार, गृहरक्षक दलाचे महासमादेशक रितेश कुमार, पोलिस महासंचालक (रेल्वे पोलिस) प्रशांत बुरडे या वरिष्ठ आयपीएस अधिकाऱ्यांचा समावेश होता.
महाराष्ट्राचे नवे पोलिस महासंचालक म्हणून निवड झालेले सदानंद दाते हे 1990 बॅचचे IPS अधिकारी आहेत. त्यांची ओळख शिस्तप्रिय व कर्तव्यनिष्ठ अधिकारी म्हणून राहिली आहे. आतापर्यंत आर्थिक गुन्हे शाखा, सायबर क्राईम, रेल्वे पोलिस, एसपी नवी मुंबई यांसारख्या विविध पदांची त्यांनी जबाबदारी सांभाळली आहे. सध्या ते एनआयएचे महासंचालक आहेत.
सदानंद दाते यांनी मुंबईतील 26/11 च्या दहशतवादी हल्ल्यावेळी महत्वाची भूमिका बजावली होती. या दहशतवादी हल्ल्यावेळी दाते हे मुंबई क्राइम ब्रांचमध्ये ड्युटीवर होते. मुंबई शहरातील कामा रुग्णालयात घुसलेल्या दोन दहशतवाद्यांशी दाते यांनी काही पोलिसांसह झुंज दिली होती. दाते यांना या हल्ल्यात दहशतवाद्यांच्या गोळ्याही लागल्या होत्या. पण दाते यांनी दाखवलेल्या धैर्य आणि प्रसंगावधानतेमुळे कामा रुग्णालयातील ओलिसांना सुरक्षितपणे पळून जाण्यात यश आले होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.