Maharashtra Politics: महाराष्ट्रात पुन्हा मोठा राजकीय भूकंप ? एकाचवेळी 13 आमदार फुटणार...; बड्या नेत्याच्या दाव्यानं खळबळ

Nagpur News: शिवसेना उद्धव बाळासाहेब ठाकरे पक्षाचे नेते आणि युवासेनेचे प्रमुख आदित्य ठाकरे यांनी हिवाळी अधिवेशनाच्या तोंडावरच केलेल्या दाव्यानं राज्याच्या राजकारणात मोठी खळबळ उडाली आहे. त्यांनी एकनाथ शिंदेंच्या शिवसेनेचे 22 आमदार भाजपच्या गळाला लागल्याचं म्हटलं होतं. आता यानंतर मंत्री संजय शिरसाट (Sanjay Shirsat) यांनी महाराष्ट्राच्या राजकारणातील भूकंपाचे संकेत दिले आहेत.

नागपूर येथे हिवाळी अधिवेशन यंदा वादळी ठरण्याची शक्यता होती. या अधिवेशनासाठी राज्यातील मंत्री आणि सर्वपक्षीय आमदार नागपूरमध्ये दाखल झाले आहेत. राज्याचे सामाजिक न्यायमंत्री व शिवसेनेचे ज्येष्ठ नेते संजय शिरसाट यांनी उद्धव ठाकरेंच्या शिवसेनेबाबत मोठा दावा केला आहे. याचदरम्यान, शिरसाट यांनी शिवसेना उद्धव ठाकरे पक्षाचे 13 आमदार माझ्या संपर्कात असल्याची माहिती दिली आहे.

शिरसाट म्हणाले, उद्धव ठाकरेंच्या शिवसेनेतील संपर्कात असलेल्या या सगळ्या आमदारांची नावे माझ्याकडे आहेत. वेळ आल्यावर सांगेन,असंही शिरसाट यांनी म्हटलं आहे. यावेळी त्यांनी हे सर्व आमदार उद्धव ठाकरेंच्या शिवसेनेच्या कार्यपद्धतीला वैतागले असून एकनाथ शिंदेंच्या शिवसेनेत प्रवेश करण्याच्या तयारीत असल्याचंही शिरसाट यांनी केलं आहे.

विधानसभा 2024 च्या निवडणुकीत उद्धव ठाकरेंच्या शिवसेना (Shivsena) पक्षाचे 20 उमेदवार विजयी झाले होते. यापैकीच 13 आमदार एकनाथ शिंदेंच्या शिवसेनेच्या संपर्कात असल्याची माहिती समोर आल्यानं राजकीय भूकंपाचे संकेत दिले जात आहेत. आगामी मुंबई महापालिका निवडणुकीच्या तोंडावर आमदार फुटल्यास हा आधीच अडचणीत आलेल्या उद्धव ठाकरेंसाठी मोठा धक्का असणार आहे.

शिवसेनेतील एकनाथ शिंदे यांच्या 2022 मधील बंडावेळी 40 आमदारांनी उद्धव ठाकरेंची साथ सोडल्यानं महाविकास आघाडी सरकार कोसळलं होतं. त्यानंतर शिंदेंनी भाजपसोबत युती करत राज्यात सत्तास्थापन केली होती. यानंतर सातत्यानं उद्धव ठाकरेंना शिंदेंनी धक्क्यावर धक्के देत त्यांचे अनेक मोठे नेते फोडले आहेत. अशातच आता राज्यात पुन्हा एकदा भूकंप होण्याची शक्यता आहे.