PAT Test Maharashtra: दिवाळीची सुट्टी संपताच विद्यार्थ्यांसमोर नवं संकट; शालेय शिक्षण विभागाचा 'हा' मोठा निर्णय!

Mumbai News: दिवाळीच्या सुट्ट्यांचा आनंद घेण्याच्या तयारीत असलेल्या लाखो विद्यार्थ्यांसाठी आणि शिक्षकांसाठी एक महत्त्वाची बातमी आहे. दिवाळीच्या सुट्टीनंतर लगेचच नोव्हेंबर अखेरीस इयत्ता दुसरी ते आठवीच्या विद्यार्थ्यांसाठी नियतकालिक मूल्यांकन चाचणी (PAT - पॅट) आयोजित केली जाणार आहे. त्यामुळे सुट्ट्यांच्या आनंदावर काहीसे विरजण पडणार असून दुसरीकडे शिक्षकांवर जनगणनेचे काम आणि परीक्षांचे नियोजन यामुळे कामाचा मोठा ताण येण्याची शक्यता आहे.

मुंबईतील साडेतीन लाखांहून अधिक विद्यार्थ्यांना परीक्षा

मुंबई महापालिकेच्या शिक्षण विभागाने दिलेल्या माहितीनुसार, पालिकेच्या ९१३ शाळांमधील सुमारे अडीच लाख विद्यार्थी या चाचणीला सामोरे जातील. याशिवाय, विभागीय शिक्षण उपसंचालक कार्यालयानुसार मुंबईतील ८०१ खाजगी अनुदानित शाळांमधील १ लाख २३ हजार ७५४ विद्यार्थीही ही चाचणी देणार आहेत.

काय आहे 'पॅट' (PAT) चाचणी?

अध्ययन प्रगतीचे मूल्यांकन: शिक्षकांनी वर्गात शिकवलेला आशय विद्यार्थ्यांना किती प्रमाणात समजला आहे, हे तपासण्यासाठी ही चाचणी घेतली जाते.

विषय आणि उद्दिष्ट: प्रामुख्याने भाषा, गणित आणि इतर निर्धारित विषयांची चाचणी घेऊन विद्यार्थ्यांच्या शैक्षणिक अडचणी शोधणे आणि ज्यांना कमी गुण मिळतील अशा विद्यार्थ्यांसाठी पूरक अध्यापन (Remedial Teaching) करणे हा यामागचा मुख्य उद्देश आहे.

सहामाही परीक्षांबाबत शाळांसमोर प्रश्नचिन्ह!

दिवाळीनंतर लगेचच 'पॅट' चाचणी होणार असल्याने नियमित सहामाही परीक्षा रद्द होणार का, असा संभ्रम निर्माण झाला आहे. मात्र, शाळांचे वार्षिक नियोजन आधीच ठरलेले असते आणि 'पॅट'मध्ये सर्व विषयांचा समावेश नसतो. त्यामुळे उर्वरित विषयांची सहामाही चाचणी शाळांना स्वतः घ्यावीच लागणार आहे.

शिक्षकांवर दुहेरी ताण

अभ्यासक्रम पूर्ण करणे, उजळणी घेणे आणि परीक्षांचे नियोजन करणे या शैक्षणिक जबाबदाऱ्यांसोबतच शिक्षकांवर जनगणनेचे आणि इतर शासकीय उपक्रमांचे काम सोपवण्यात आले आहे. त्यामुळे सुट्टीनंतर शाळा सुरू होताच शिक्षकांची प्रचंड धावपळ उडणार असल्याचे चित्र दिसून येत आहे.