Disha Salian Case : आदित्य ठाकरेंच्या अडचणीत वाढ? मालवणी पोलिस अलर्टमोडवर, दिशाच्या वडिलांनाही बोलवणार?

Mumbai News : गेल्या पाच वर्षांपासून शांत असणाऱ्या दिशा सालियन प्रकरणात उच्च न्यायालयात पुन्हा याचिका दाखल करण्यात आली आहे. दिशाचे वडिलांनी ही याचिका दाखल केली असून दिशाचा सामुहिक बलात्कार करण्यात आला आणि तिची हत्या करण्यात आल्याचा दावा त्यांनी केला आहे. सोबतच दिशाच्या वडिलांनी शिवसेना ठाकरे गटाचे नेते आदित्य ठाकरे यांच्यावर देखील आरोप केले आहेत. यावरून राज्यातील राजकीय वर्तुळात आरोप-प्रत्यारोपाचं राजकारण सुरू झालं आहे. याचदरम्यान आता या प्रकरणात मोठी अपडेट समोर आली आहे.

दिशा सालियन प्रकरणात उच्च न्यायालायत याचिका दाखल करण्यात आल्यानंतर आता या प्रकरणात पोलिस तपास सुरू झाला आहे. या प्रकरणी मालवणी पोलीस आज (ता. 24) दिशाच्या वडिलांचा जबाब नोंदवण्याची शक्यता आहे. यामुळे आदित्य ठाकरे यांच्यासह अनेकांच्या अडचणीत वाढ होण्याची शक्यता आहे.

दिशा सालियन प्रकरणात मालवणी पोलीस ठाण्यात दिशाचे वडील सतीश सालियन जाण्याची शक्यता आहे. येथे त्यांचा जबाब नोंदवण्याची शक्यता आहे. दरम्यान शनिवारी (ता.22) याप्रकरणी सतीश सालियन यांच्या वकिलांचे एका पथकाने मालवणी पोलीस ठाण्यात जावून पुराव्याची मागणी केली होती. ज्यानंतर आता मालवणी पोलीस सतीश सालियन यांना बोलावण्याची शक्यता आहे.

दरम्यान दिशा सालियनच्या मृत्यू प्रकरणावरून राजकीय वर्तुळात आरोप-प्रत्यारोपाचं राजकारण सुरू आहे. अशावेळी भाजप नेते नारायण राणे यांनी पत्रकार परिषदेत माजी मुख्यमंत्री उद्धव ठाकरे यांच्यावर गंभीर आरोप केले होते. तर या प्रकरणावरून ठाकरेंनी त्यांना दोन फोन केले होते, असा दावा केला.

तसेच सालियन कुटुंबावर राजकीय दबाव होता, पोलिसांनी त्यांना सहकार्य केलं नाही, असाही दावा राणेंनी यांनी केला होता. पण हा दावा उद्धव ठाकरेंच्या शिवसेनेने फेटाळून लावले असून जेव्हा राणेंना अटक झाली तेव्हा उद्धव ठाकरेंच फोन आल्याचा पलटवार करताना संजय राऊत यांनी दावा केला आहे.