Manoj Jarange Mumbai March : मनोज जरांगेंची मुंबईत जाण्याची घोषणा, कोर्टाच्या निर्णयाचा बसणार फटका?

Manoj Jarange Mumbai Protest News : मनोज जरांगे पाटील यांनी मुंबईत आंदोलन करण्याची घोषणा केली आहे. उद्या (शनिवारी) त्यांनी यासंदर्भात आंतरवाली सराटीमध्ये बैठक देखील बोलावली आहे. जरांगे पाटील यांचे उपोषण सुरू आहे. मात्र, सरकार त्याला अपेक्षित प्रतिसाद देत नसल्याने हे आंदोलन अधिक आक्रमक करण्यासाठी त्यांनी चलो मुंबईचा नारा दिला आहे.

जरांगे पाटील यांनी मुंबईत आंदोलनाची घोषणा केली असली तरी कोर्टाचा निर्णयामुळे त्यांची कोंडी होणार आहे. जरांगे पाटील यांनी मागील वेळी आझाद मैदानावर आंदोलन केले होते. त्याची गंभीर दखल कोर्टाने घेतली होती. त्याचवेळी न्यायालयाने स्पष्ट केले होते की, आझाद मैदानावर आंदोलनसाठी केवळ पाच हजार आंदोलकांना परवानगी असेल. आंदोलकांना आझाद मैदान सोडून इतरत्र आंदोलन करता येणार नाही. त्यांच्या आंदोलनामुळे वाहतूक आणि इतर नागरी समस्या निर्माण झाल्या नाही पाहिजेत.

या पार्श्वभूमीवर मनोज जरांगे पाटील हे पुन्हा मुंबईत आले तर ते आंदोलनासाठी आझाद मैदानावर येण्याची शक्यता आहे. मराठा आंदोलकांनी यापूर्वीच आझाद मैदानाची पाहणी केली होती. त्यामुळे ते पुन्हा आझाद मैदानाच आंदोलन करणार अशी शक्यता होती. दरम्यान, राज्य सरकारकडून जरांगे पाटील यांना मुंबईच्या ऐवजी नवी मुंबईतील मोकळ्या मैदानात आंदोलनासाठी परवानगी देत त्यांना मुंबई येण्यापासून रोखले जाऊ शकते.

सरकारने नियम बदलला

मनोज जरांगेंच्या आंदोलनाच्या आधीच दक्षिण मुंबईमध्ये आंदोलन करता येणार नसल्याचे राज्य सरकारने स्पष्ट केले होते. फक्त आझाद मैदानावर आंदोलन करता येईल. शिवाय आंदोलनासाठी आठवडाभर आधी परवानगी घ्यावी लागेल. आंदोलन सकाळी १० ते सायंकाळी ६ या वेळेतच करता येईल, त्यानंतर आंदोलनकर्त्यांना आझाद मैदान खाली करावे लागेल.दक्षिण मुंबईत कुठेही आंदोलन मोर्चे, धरणे करण्यास मनाई करण्यात आली आहे. शिवाय आझाद मैदानासाठी आधी अर्ज केलेल्यांना आधी परवानगी मिळणार आहे