Manoj Jarange Patil : ''फडणवीसांना त्यांच्या आईवर बोलल्यावर राग येतो, आमच्या आईचं सोन्यासारखं लेकरु..'' जरांगे भावूक

Maratha reservation protest : मराठा समाजाला ओबीसी प्रवर्गातून आरक्षण मिळावं या मागणीसाठी मुंबईतील आझाद मैदानावर मनोज जरांगे पाटील यांचे बेमुदत उपोषण सुरु आहे. आज त्यांच्या उपोषणाचा चौथा दिवस आहे. आझाद मैदानातून जरांगे पाटील यांनी पुन्हा मुख्यमंत्री देवेंद्र फडणवीस यांना लक्ष्य केलं आहे. त्यांच्यावर टीकेची झोड उठवली.

जरांगे पाटील म्हणाले, मला अशी माहिती मिळाली रात्री पुन्हा एक आमचा मराठा बांधव मुंबईत अॅटक येऊन वारला. देवेंद्र फडणवीस यांच्यामुळे आमचा आतापर्यंत तिसरा खून झाला. देवेंद्र फडणवीस यांना त्यांच्या आईवर बोलल्यावर राग येतो. इथे आमच्या आईचं लेकरु गेलं. आईच्या कुशीत खेळणारं तिचं सोन्यासारखं लेकरु आरक्षणाच्या मागणीसाठी मेलं. याची लाज तुझ्या मंत्र्याला वाटू दे...कारण देवेंद्र फडणवीसांना दुख्ख झालं तर आमच्या नेत्याला दुख्ख होतं, मराठ्याची पैदास आहे ती. ९६ कुळी आहे की नाही की ६ नंबरची आहे काय माहित असा टोला त्यांनी नाव न घेता नितेश राणे यांनाही लगावला.

जरांगे पाटील पुढे म्हणाले, देवेंद्र फडणवीसांच्या आईला-त्या माय माऊलीला आमचं सांगण आहे. आई जसं तुमचं देवेंद्र फडणवीस लेकरु आहे. तसं आमच्याही आईचं काल लेकरु देवेंद्र फडणवीस साहेबांनी हिरावून घेतलं. आई त्या लेकराबद्दल बोलतात तर एक शब्द तरी या लेकराबद्दलही बोला अशी आमची अपेक्षा आहे. गरिबाचं लेकरु आरक्षणासाठी पायपीट करत मुंबईला तुमच्या पोराच्या दारात आलं होतं. पण तुमच्या पोराने त्याला न्याय तर दिलाच नाही पण त्याचा खून केला. अॅटक येऊन मेला म्हणजे त्याला खूनच म्हणलं जातं असा आरोप जरांगे पाटील यांनी फडणवीसांवर केला.

तुम्ही देवेंद्र फडणवीसांच्या आई आहात. एक आईचं दुसऱ्या आईची वेदना समजू शकते. या आईचं काळीज किती जळालं असेल तीचं सोन्यासारखं लेकरु कायमचं तीच्या कुशीतून निघून गेलं. एकदा तरी मायेचं छत्र शब्दातून देवेंद्र फडणवीस यांच्या आईने व देवेंद्र फडणवीसांनी व्यक्त करावं अशी आमची भावना आहे असं भावूक होत जरांगे पाटील बोलले.

गेलं आमचं लेकरु शेवटी पण तुम्ही आरक्षण दिलं नाही. आई इतका तुमच्या लेकराने आमचा जीव स्वस्त केलाय का की मराठ्याच्या लेकरानं कुठं पण मरावं. अन् तुमच्या लेकराने म्हणजे देवेंद्र फडणवीसांनी त्याच्यावर हसावं. इतका स्वस्त आमचा जीव झालाय का? इतकी बिकट परिस्थिती तुमच्या मुलाने निर्माण केली. मग ही हीटलर शाही आहे का? असा सवाल जरांगेंनी उपस्थित केला. राजकीय स्वार्थापोटी तुमचं पोरंग कुठल्या थराला चाललं असं जरांगे पाटील म्हणाले.