Manoj Jarange Vs Sambhaji Bhide : हे फडणवीसांचं नवं अस्त्र! मनोज जरांगेंचा संभाजी भिडेंवर पलटवार

Mumbai : शिवप्रतिष्ठान हिंदुस्थानचे अध्यक्ष संभाजी भिडे यांचे मराठा आरक्षणाबाबतचे वक्तव्य चर्चेत आले आहे. त्यावरून मनोज जरांगे यांनी उपमुख्यमंत्री देवेंद्र फडणवीस यांचे नाव घेत भिडेंना प्रत्त्युत्तर दिले आहे.

काय म्हणाले संभाजी भिडे?

मराठा आरक्षणावर बोलताना भिडे म्हणाले, मराठ्यांनी आरक्षण मागावं का, अरे, मराठ्यांनी उभा देश चालवायचा आहे. आरक्षण कुठून काढलं. सिंहांनी संबंध जंगल सांभाळायचंय. उभ्या पृथ्वीवर असलेल्या सगळ्या सागरात विना अडथळा फिरण्याचे स्वातंत्र असलेले मासे आहेत. त्यांनी स्वीमिंग क्लबमध्ये जायचे नाही.

गरुडांनी ग्लायडिंग क्लबमध्ये जायचे नाही. कमांडोंनी ट्रेनिंग कॅम्पची अपेक्षा करायची नाही. मराठा जात ही संबंध देशाचा संसार चालवणारी जात, हे मराठ्यांच्या ज्यादिवशी मराठ्यांच्या लक्षात येईल, त्यादिवशी या मातृभूमीचे भाग्य उजळून जाईल, असे वक्तव्य भिडे यांनी केले आहे.

जरांगेंचे प्रत्युत्तर

भिडेंना प्रत्युत्तर देताना जरांगेंनी फडणवीसांवर निशाणा साधला. हे शब्द देवेंद्र फडणवीस यांचे आहेत. याला-त्याला दोष देऊन उपयोग नाही. जंगल आमचं आहे ना, मग वाघ आरक्षणाची शिकार करणार. कशाला लागतंय आरक्षण, हे ज्या-ज्या संघटनेत पक्षात मराठ्यांची पोरं आहेत, त्यांना माहिती आहे. कारण त्या पक्षाचा किंवा संघटनेचा झेंडा उचलून तो आपल्या लेकरांचं बहीण-भावाचं कल्याण करू शकत नाही. त्यांना आरक्षण लागणार आहे, असे भूमिका जरांगे यांनी मांडली.

देवेंद्र फडणवीसांमुळे भाजपपासून मराठा लांब चालला आहे. आता ह्यांच्यापासूनही जाईल. आम्हीही छत्रपतींच्या विचारांचे हिंदू आहोत. आम्ही आमचं आरक्षण मिळवू. देवेंद्र फडणवीस एक-एक अस्त्र काढत आहेत, आता हे नवीन अस्त्र काढलंय, अशी टीका जरागे यांनी केली.

भिडेंचा होता आरक्षणाला पाठिंबा

संभाजी भिडे यांनी मागील वर्षी मनोज जरांगे यांचे आंदोलन सुरू असताना तिथे जाऊ भेट घेतली होती. यावेळी त्यांनी जसं पाहिजे तसं मराठा समाजाला आरक्षण मिळालंच पाहिजे, अशी भूमिका मांडली होती. आम्ही तुमच्यासोबत उभे आहोत, असेही ते म्हणाले होते. त्यामुळे आजच्या त्यांच्या विधानामुळे आपल्या भूमिकेपासून त्यांनी फारकत घेतल्याची चर्चा सुरू झाली आहे.