Sanjay Shirsat : पालकमंत्री संजय शिरसाट पहिल्याच डीपीडीसीत अब्दुल सत्तारांना दणका देणार!

Shivsena News : जिल्ह्याचे पालकमंत्री संजय शिरसाट यांनी 26 जानेवारी रोजी शासकीय ध्वजारोहण केले आणि त्यानंतर जिल्हाधिकारी कार्यालयात पहिली बैठक घेतली. जिल्हा नियोजन समितीमध्ये मागच्या पालकमंत्र्यांनी मंजुर केलेली कामे, वाटप झालेला निधी, निघालेल्या वर्क आॅर्डर या सगळ्यांचा आढावा घेतला.

660 कोटींचा निधी डीपीडीसीला मिळाला होता, त्यातील 90 टक्के निधीचे नियोजन माजी पालकमंत्री अब्दुल सत्तार यांनी केले होते. त्यांनी मंजूर केलेल्या दीडशे कोटींच्या कामावर नवनिर्वाचित पालकमंत्री संजय शिरसाट फुली मारण्याची शक्यता आहे.

जेमतेम दीडशे कोटी खर्च करण्याचे अधिकार पालकमंत्री संजय शिरसाट (Sanjay Shirsat) यांना असणार आहे. मार्च पर्यंत हा निधी खर्च करावा लागणार असल्याने आता अब्दुल सत्तार यांनी मंजूर केलेली कोणती कामे शिरसाट बदलतात? त्यावर अब्दुल सत्तार काय भूमिका घेतात हे पाहणे महत्वाचे ठरणार आहे.

2024 मध्ये झालेल्या लोकसभा निवडणुकीत संदीपान भुमरे निवडून आल्यानंतर अब्दुल सत्तार यांच्याकडे चार महिन्यांसाठी पालकमंत्री पद आले होते. विधानसभेच्या निवडणुका डोळ्यासमोर ठेवत सत्तार यांनी जिल्हा नियोजन समितीतील निधीतून सर्वाधिक निधी आपल्या सिल्लोड-सोयगाव मतदारसंघात नेला.

सिल्लोडमध्ये तब्बल 51 कोटींचा निधी सत्तार यांनी आपल्या अधिकारात दिला होता. विशेष म्हणजे अब्दुल सत्तार (Abdul Sattar) यांनी वाटप केलेल्या 508 कोटींच्या कामाला सुरुवात देखील झाली आहे. त्यामुळे ही कामे संजय शिरसाट यांना बदलता येणार नाहीत हे स्पष्ट आहे. संजय शिरसाट यांनी पालकमंत्री होण्याआधीच अब्दुल सत्तार यांनी निधी वाटपात भेदभाव केल्याचे सांगत त्यांनी मंजूर केलेल्या कामांचा आढावा घेऊन निर्णय घेण्यात येईल असे स्पष्ट केले होते.

आता येत्या 30 जानेवारी रोजी होणाऱ्या पहिल्या डीपीडीसी बैठकीत पालकमंत्री संजय शिरसाट काय निर्णय घेतात? कोणती कामे बदलतात? सत्तार यांच्या सिल्लोड नगरपरिषदेला देण्यात आलेल्या 51 कोटींच्या परंतु अद्याप काही कारणांमुळे प्रत्यक्षात सुरू न झालेल्या कामांबाबत काय भूमिका घेतात हे महत्वाचे ठरणार आहे.

माजी मंत्री अब्दुल सत्तार या बैठकीला हजर राहणार की मग दांडी मारणार? यावर पालकमंत्री संजय शिरसाट यांच्या अध्यक्षतेखालील पहिली बैठक वादळी ठरणार की शांतते पार पडणार? हे ठरेल.

संघर्ष अटळ

अब्दुल सत्तार हे डीपीडीसीच्या बैठकीला हजर राहिले तर पालकमंत्री संजय शिरसाट आणि सत्तार यांच्यात संघर्ष अटळ असल्याचे बोलले जाते. एकाच पक्षात असले तरी या दोन नेत्यांमधून सध्या विस्तव देखील जात नाही.

संजय शिरसाट मंत्री झाल्यानंतर त्यांनी सत्तार यांना टार्गेट केले होते. सिल्लोडमधून दादागिरी संपवणार, असा इशारा त्यांनी दिला होता. तर सिल्लोडमध्ये येणे इतके सोपे आहे का? मीच संभाजीनगरात येऊन तुमची दादागिरी संपवतो, अशा शब्दात सत्तार यांनी शिरसाट यांना आव्हान दिले होते.

अब्दुल सत्तार पालकमंत्री असतांना जिल्ह्याचे संपूर्ण प्रशासन त्यांच्या दबावात काम करत होते, असा आरोप केला जातो. संजय शिरसाट यांनी जिल्हाधिकारी कार्यालयात घेतलेल्या पहिल्या बैठकीत दबावाखाली काम करू नका, मंत्री असो की लोकप्रतिनिधी जे योग्य आहे तेच करा, अशा सूचना संजय शिरसाट यांनी प्रशासनातील वरिष्ठ अधिकाऱ्यांना दिल्या होत्या. या पार्श्वभूमीवर 30 जानेवारी रोजी होणार्‍या जिल्हा नियोजन समितीच्या बैठकीकडे जिल्ह्याचे लक्ष लागले आहे.