सिल्लोडमध्ये मतदारांना पैसे वाटपाचा आरोप झाल्यानंतर अब्दुल सत्तार यांनी अंबड येथील सभेत वादग्रस्त वक्तव्य केले.
“पैसे मिळाले तर काजू-किशमीश समजून खा” असा सल्ला त्यांनी मतदारांना दिला असल्याचे समोर आले.
या विधानावर विरोधकांनी जोरदार टीका केली असून प्रकरणाने महाराष्ट्रात राजकीय तापमान चांगलेच वाढवले आहे.
Shiv sena MLA Statement News : शिवसेनाचे आमदार तथा माजी मंत्री अब्दुल सत्तार यांच्या सिल्लोड नगर परिषदेतच त्यांच्या समर्थकांकडून पैसे वाटप केले जात असल्याचा आरोप भाजपच्या स्थानिक कार्यकर्त्यांनी केला. इतकेच नाहीतर एका प्रभागात याद्यांसह पैसे वाटप करणाऱ्या कार्यकर्त्यांना धरून देत भाजपच्या लोकांनी सिल्लोडमधील 'लक्ष्मी दर्शन' चव्हाट्यावर आणले. इकडे सिल्लोडमध्ये अब्दुल सत्तार यांच्याकडूनच पैसे वाटप केले जात असल्याचा आरोप होत असताना तिकडे अंबडच्या एका सभेमध्ये सत्तार यांच्याकडून धक्कादायक विधान करण्यात आले आहे.
शिवसेनेच्या उमेदवाराकडे पैसे नाहीत, पण जे तुम्हाला पैसे वाटणार आहेत ते काजू किशमिश समजून खाऊन घ्या. ते तुमचेच पैसे आहेत त्यांच्या बाबजाद्यांचे नाही' असा सल्ला अब्दुल सत्तारांनी दिला. शिवसेना पक्षाच्या वतीने जाहीर करण्यात आलेल्या अधिकृत स्टार प्रचारकांच्या यादीत अब्दुल सत्तार यांचा समावेश करण्यात आला नाही. परंतु उपमुख्यमंत्री एकनाथ शिंदे यांच्या बुलढाणा दौऱ्यात आमदार संजय गायकवाड यांच्या पत्नीच्या प्रचार सभेत अब्दुल सत्तार आवर्जून उपस्थित होते.
यावेळी शिंदे यांच्याशी व्यासपीठावर त्यांनी चर्चाही केली. एकमेकांशी केलेल्या कानगोष्टीनंतर अब्दुल सत्तार जालना व इतर आसपासच्या जिल्ह्यांमध्ये प्रचार सभांमध्ये भाषण करताना दिसू लागलेत. अंबड नगरपालिकेच्या शिवसेनेच्या उमेदवारांच्या प्रचारासाठी झालेल्या सभेत अब्दुल सत्तार यांनी मतदारांना पैसे घेण्याचे आवाहन करणारे विधान केले. भाजपचे आमदार तथा जिल्हाध्यक्ष नारायण कुचे विरुद्ध शिवसेना असा थेट सामना इथे पाहायला मिळतो.
अंबड नगरपालिकेच्या निवडणुकीत शिवसेनेचा भगवा भडकवा, असे आवाहन करताना 'जे तुमच्याकडे पैसे घेऊन येतील त्यांचे पैसे काजू किशमिश समजून खा, पण मतदान शिवसेनेलाच करा असे जाहीर आवाहन सत्तार यांनी उपस्थितांना केले. सत्तेचा माज आलेल्या लोकांकडून जे पैसे वाटप केले जाणार आहेत ते जनतेचे पैसे आहेत, त्यांच्या बाबजाद्यांचे नाही. त्यामुळे ते घ्या, मात्र मतदान आम्हालाच करा याचा पुनरुच्चार अब्दुल सत्तार यांनी केला.
इकडे अंबडमध्ये पैसे काजू किशमिश म्हणून खाऊन घ्या, असा सल्ला देणाऱ्या अब्दुल सत्तार यांच्या सिल्लोडमध्ये त्यांच्याच समर्थकांकडून होत असलेले पैशाचे वाटप मतदारांनी काय समजून खावे? असा प्रश्न आता विरोधक उपस्थित करत आहेत. सिल्लोड नगर पालिकेवर गेल्या वीस वर्षांपासून अब्दुल सत्तार यांची सत्ता आहे. मात्र 2024 मध्ये झालेल्या विधानसभा निवडणुकीत सत्तार यांचा अगदी थोड्या मतांनी विजय झाला. या पार्श्वभूमीवर सत्तार यांनी कुठलीही जोखीम न पत्करण्याची भूमिका घेतली आहे.
गेल्या अनेक महिन्यांपासून सिल्लोडमध्ये ठाण मांडून बसलेल्या अब्दुल सत्तार यांची प्रतिष्ठा या निवडणुकीच्या निमित्ताने पणाला लागली आहे. भाजपकडून अगदी शेवटच्या टप्प्यात आपण ही निवडणूक गांभीर्याने लढवत असल्याचे चित्र दिसू लागले आहे. आता शेवटच्या दोन दिवसात सिल्लोड शहरात होणाऱ्या लक्ष्मी दर्शनाचा प्रभाव निवडणूक आयोग आणि एकमेकांचे विरोधक कसा रोखतील? यावर नगरपालिकेच्या सत्तेचे गणित अवलंबून असणार आहे.
1. अब्दुल सत्तार यांच्यावर कोणता आरोप करण्यात आला आहे?
मतदारांना पैसे वाटप केल्याचा गंभीर आरोप करण्यात आला आहे.
2. अंबडमध्ये त्यांनी काय वादग्रस्त वक्तव्य केले?
“पैसे मिळाले तर काजू-किशमीश समजून खा” असा सल्ला दिल्याचे समोर आले.
3. विरोधकांनी काय प्रतिक्रिया दिली?
विरोधकांनी याला मतदारांचा अपमान आणि निवडणूक गैरव्यवहार ठरवत कठोर कारवाईची मागणी केली.
4. या प्रकरणाचा व्हिडिओ व्हायरल झाला आहे का?
हो, सोशल मीडियावर हा भाषणाचा व्हिडिओ मोठ्या प्रमाणात व्हायरल झाला.
5. या वादाचा निवडणूक वातावरणावर काय परिणाम झाला?
राजकीय संघर्ष अधिक चिघळला असून सर्व पक्षांमध्ये तीव्र आरोप-प्रत्यारोप सुरू आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.