Abdul Sattar News : सिल्लोडमध्ये भाजपकडून अब्दुल सत्तार यांच्या समर्थकांवर पैसे वाटपाचा आरोप; कार्यकर्ते भिडले

Sillod Municipal Council News : नगरपपालिका निवडणुकीचा प्रचार आता शेवटच्या टप्प्यात आला आहे. राज्यातील नेत्यांचे धावते दौरे, सभा, काॅर्नर बैठकांचा धडका सुरू असतानाच आता पैशाच्या बॅगाही बाहेर निघायला लागल्या आहेत की काय? अशी चर्चा होऊ लागली आहे. सिल्लोड नगरपालिकेच्या प्रचारानिमित्त शहरातील एका प्रभागात अब्दुल सत्तार यांच्या समर्थकांकडून याद्यानूसार पैशांचे वाटप केले जात असल्याचा आरोप भाजपाच्या उमेदवार आणि कार्यकर्त्यांनी केला.

हातात रजिस्टर आणि मतदारांना पैसे वाटत असल्याचा आरोप करत प्रभाग क्रमांक 8 मध्ये भाजपाचे गणेश भुमकर, संतोष शिंदे यांनी शिवसेनेच्या कार्यकर्त्यांना रोखत जाब विचारला. त्यामुळे एकच गोंधळ उडाला आणि सत्तार समर्थकांनी या दोघांवर हल्ल्याचा प्रयत्न केल्याचा प्रकार समोर आला आहे. सत्तार समर्थकांनी भाजपचे आरोप फेटाळून लावत त्यांच्या अंगावर धावून जाण्याचा प्रयत्न केला.

पोलीसांनी वेळीच हस्तक्षेप केल्याने मोठा अनर्थ टळाला. सध्या तरी या प्रकाराबद्दल कुठलीही तक्रार भाजपच्या वतीने पोलीस किंवा निवडणूक आयोगाकडे देण्यात आलेली नाही. सिल्लोड नगरपालिकेत माजी मंत्री अब्दुल सत्तार यांचे चिरंजीव समीर आणि भाजपचे मनोज मोरेल्लू यांच्या नगराध्यक्ष पदासाठी लढत आहे. सिल्लोड शहरात शिवसेनेकडून पैसे वाटप होत असल्याचा आरोप भाजपच्या कार्यकर्त्यांनी केला.

एक महिला आणि काही पुरुष हातामध्ये याद्या आणि पैसे घेऊन गल्लोगल्ली फिरत असल्यावरून त्यांना पकडून जाब विचारण्यात असल्याचा व्हिडिओ सोशल मीडियावर व्हायरल झाला आहे. त्यात घोषणाबाजी, गोंधळ आणि कार्यकर्ते एकमेकांच्या अंगावर धावून जात असल्याचे दिसत आहेत. पोलीसांनी दोन्ही बाजूच्या कार्यकर्त्यांना बाजूला नेत तणाव टाळण्याचा प्रयत्न केला.

प्रभाग क्रमांक आठमध्ये गणेश भुमकर आणि संतोष शिंदे यांनी शिंदेसेनेकडून मतदारांना पैसे वाटप केले जात असल्याचा आरोप केला. त्यांना या कार्यकर्त्यांवर सत्तार समर्थक धावून गेले. भाजप-शिवसेनेचे कार्यकर्ते एकमेकांच्या अंगावर धावून गेल्याने या भागात तणाव पसरला होता. पोलीसांनी वेळीच हस्तक्षेप केला आणि दोन्ही बाजूच्या कार्यकर्त्यांना पांगवले. या नंतर शहरातील राजकीय वातावरण तापले आहे.

सिल्लोड विधानसभा निवडणुकीत अब्दुल सत्तार यांचा निसटता विजय झाला होता. त्यानंतर होऊ घातलेल्या नगरपालिका निवडणुकीत सत्ता कायम राखत मुलाला नगराध्यक्ष म्हणून निवडून आणण्यात सत्तार यांची प्रतिष्ठा पणाला लागली आहे. आतापर्यंत प्रचारात विकासकामांचा उल्लेख केला जात होता. आता मात्र लक्ष्मी दर्शन सुरु झाले असल्याची चर्चा या निमित्ताने होऊ लागली आहे.

FAQs

1. सिल्लोडमध्ये नेमका वाद कशावरून झाला?
पैसे वाटपाच्या आरोपांवरून भाजप आणि शिवसेनेचे कार्यकर्ते आमनेसामने आले.

2. आरोप कोणावर करण्यात आला आहे?
अब्दुल सत्तार यांच्या समर्थकांवर मतदारांना पैसे देत असल्याचा आरोप करण्यात आला.

3. या प्रकरणाचा व्हिडिओ व्हायरल झाला आहे का?
हो, सोशल मीडियावर एक व्हिडिओ व्हायरल झाल्यामुळे कारवाईची मागणी वाढली आहे.

4. विरोधकांची मुख्य मागणी काय आहे?
निवडणूक आयोगाने तातडीने तपास सुरू करावा आणि कारवाई करावी.

5. या घटनेचा निवडणूक वातावरणावर काय परिणाम झाला?
राजकीय तणाव वाढला असून दोन्ही पक्षांच्या नेत्यांमध्ये आरोप-प्रत्यारोप सुरू झाले आहेत.