CJP Protest: 'सीजेपी'च्या अभिजीत दिपकेंच्या आणखी एका आंदोलनाला यश; 'स्कूल ठीक करो' अभियानाचा पहिला दणका

Hingoli ZP School : काॅक्रोच जनता पार्टीचे संस्थापक अध्यक्ष अभिजीत दिपके यांनी स्वातंत्र्य दिनापासून सुरू केलेल्या 'स्कूल ठीक करो' अभियानाची देशभरात चर्चा होत आहे. ग्रामीण भागातील शाळांची दुरावस्था, विद्यार्थ्यांना मिळत असलेल्या अपुऱ्या सुविधा, शाळांमधील शिक्षकांचं बेजबाबदार वागणं यासह इतरही समस्यांना वाचा फोडण्यासाठी दिपके यांनी ही मोहीम सुरू केली.

हिंगोली या आपल्या गावातून अभियानाला सुरूवात केल्यानंतर दिपके दुसऱ्यांदा हिंगोलीत आले. मद्यपी मुख्याध्यापकाला निलंबित करा, अशी मागणी करणाऱ्या विद्यार्थी आणि ग्रामस्थांच्या आंदोलनाला अभिजीत दिपके यांनी पाठिंबा दर्शवत सहभाग नोंदवला.

अनेक वर्षापासून जर हा मद्यपी मुख्याध्यापक शाळेत येत होता, लोक, पालक, विद्यार्थी तक्रार करत होते, तर तुमच्या शिक्षण अधिकाऱ्यांनी इतकी वर्ष काय केले? असा सवाल दिपके यांनी संबंधित अधिकाऱ्यांना केला.

देशी दारूची बाटली घेऊन मुख्याध्यापक शाळेत यायचा, त्याच अवस्थेत विद्यार्थ्यांशी बोलायचा. तुमची मुलं-मुली जर या शाळेत असती तर तुम्ही कारवाईला इतका वेळ लावला असता का? असा सवाल दीपके यांनी केला. आंदोलन उग्र रुप धारण करत असल्याचे लक्षात येताच शिक्षण विभागाने लिंबाळा गावातील शाळेच्या मुख्याध्यापकाला निलंबित केले आहे.

या संदर्भात स्वत: दिपके यांनी व्हिडिओद्वारे माहिती दिली. त्यांनी हा विजय लिंबाळा गावचे ग्रामस्थांचा असल्याचे म्हटले आहे. लिंबाळा गावातील ग्रामस्थांसाठी हा पहिला मोठा विजय आहे. ग्रामस्थांनी एकत्र येऊन आंदोलन करण्याचा निर्णय घेतला त्यामुळे आज हा निर्णय झाला अन्यथा हा निर्णय झाला नसता.

आपल्याला असंच पुढे येऊन लढायचं आहे. आता केवळ मुख्याध्यापकांना निलंबित करण्यात आले आहे. आपल्याला शाळेत शिक्षकांचा स्टाफ हवा आहे, नवीन बाक हवे आहेत. हे जोपर्यंत मिळत नाही, तोपर्यंत हे आंदोलन सुरू ठेवायचे आहे, असेही अभिजीत दीपके यांनी सांगितले आहे.