Abu Azmi News : मुस्लिम वोट बॅंकेसाठी सपा मैदानात, अबू आझमींनी घेतली बैठक..

Samajwadi Party : समाजवादी पक्षाचे प्रदेशाध्यक्ष आमदार अबू असीम आझमी (Abu Azmi) यांनी आपला मोर्चा छत्रपती संभाजीनगरकडे वळवला आहे. आगामी महापालिका, विधानसभा निवडणुका पाहता मुस्लिम वोट बॅंकेचा काही वाटा आपल्या पक्षाकडे वळवता येतो का ? याची चाचपणी आझमी यांनी शहरात मेळावा आणि बैठकांच्या माध्यमातून केली.

एमआयएम ही भाजपची टीम आहे, त्यांनी कोणत्या राज्यात किती जागा लढवायच्या, कुठून उमेदवार उभे करायचे, उमेदवारी कुणाला द्यायची याचा निर्णय अमित शहाच घेतात, असा गंभीर आरोप देखील आझमी यांनी केला. यावरून सपाचे लक्ष्य एमआयएम (Aimim) असल्याचे संकेत देखील त्यांनी दिले आहेत. आबू आझमी नुकतेच शहरात येवून गेले, त्यांनी समाजवादी पक्षाला (Samajwadi Party) नव्याने शहर व जिल्ह्यात उभारी देण्याचे प्रयत्न सुरू केले आहे.

मौलाना अब्दुल कलाम रिसर्च सेंटरमधील मेळाव्यात त्यांनी भविष्यात आपल्या पक्षाची दिशा काय असेल हे देखील स्पष्ट केले. गेली कित्येक वर्ष काॅंग्रेस सोबत असलेली मुस्लिम वोट बॅंक आता विखुरली गेली आहे. (Abu Azmi) जुने-जानते लोक अजूनही काॅंग्रेसची साथ सोडायला तयार नसले तरी तरुणांनी मात्र काॅंग्रेसला पर्याय म्हणून एमआयएमचा स्वीकार केल्याचे चित्र आहे.

परंतु एमआयएम ही भाजपची बी टीम आहे, त्यांच्या उमेदवारांमुळे इतर पक्षांचे उमेदवार पडतात आणि त्याचा थेट फायदा भाजपला होता, असा आरोप देखील आझमी यांनी केला. देशात मुस्लिम मतांचा टक्का निर्णयक असतांना देखील सध्या मुस्लिम समाजाची अवस्था वाईट झाली आहे. त्यामुळे आपल्या एकत्रितपणे या परिस्थितीला तोंड द्यावे लागेल. स्वतःच्या स्वार्थासाठी नाही, तर समाजाच्या भल्यासाठी राजकारण करा, असा सल्ला देखील त्यांनी विरोधकांना दिला.

यापुढे निवडणुकीत कोणाच्या पाठीशी उभे राहायचे हे ठरवण्यासाठी एक कमिटी स्थापन करा, ही कमिटी जो निर्णय घेईल, त्यालाच मुस्लिम समाजाने मतदान करावे. असे झाले तरच आपली किंमत इतर राजकीय पक्ष करतील. आपण एकजूट राहिलो तर आपल्याला न्याय मिळेल, मागण्या मान्य केल्या जातील, असे आवाहन देखील आझमी यांनी केले. शहरांची नावे बदलण्यावरून देखील त्यांनी भाजपला सुनावले. जुन्या शहरांची नावे बदलण्यापेक्षा नवी शहरे निर्माण करा आणि त्याला तुम्हाला हवे त्यांचे नाव द्या, असा टोलाही आझमी यांनी लगावला.