Beed News : कमळ अन् घड्याळही नकोरे बाबा; अंबाजोगाईच्या नेत्यांचा आघाडीसाठी प्रयत्न!

Local Body Election News : जिल्ह्यातील सहा नगर पालिकांच्या निवडणुकीची प्रक्रीया उमेदवारी अर्ज दाखल करण्याने सुरु झाली आहे. बहुतांश ठिकाणी महायुतीतील भाजप व राष्ट्रवादी काँग्रेस पक्षच समोरा - समोर येण्याची चिन्हे आहेत. अंबाजोगाईत मात्र महायुतीतीलच दोन पक्षांचे मातब्बर समोरा - समोर येण्याचे निश्‍चित असले तरी ते आपल्या पक्षाचे चिन्ह बाजूला सारण्याच्या मानसिकतेत आहेत.

मुस्लिम मतांची बेगमी, राष्ट्रवादी काँग्रेसला राष्ट्रवादी काँग्रेस शरदचंद्र पवार पक्षाला सोबत घ्यायचे असल्याने पक्षांच्या चिन्हाऐवजी आघाडीसाठी या नेत्यांचे प्रयत्न आहेत. राष्ट्रवादी काँग्रेसचे राजकिशोर मोदी आणि भाजपचे नंदकिशोर मुंदडा रिंगणात उतरणार हे निश्‍चित झाले आहे. बीड, अंबाजोगाई, परळी, धारुर, माजलगाव आणि गेवराई या सहा नगर पालिकांच्या निवडणुकीसाठी तीन दिवसांपासून उमेदवारी अर्ज भरण्याची प्रक्रीया सुरु झाली आहे.

गेवराईत राष्ट्रवादी काँग्रेस व भाजपने उमेदवारही जाहीर केले आहेत. माजलगाव, धारुरमध्ये हेच दोन पक्ष आमने - सामने असतील. बीडमध्ये मात्र राष्ट्रवादी काँग्रेस आणि राष्ट्रवादी काँग्रेस शरदचंद्र पवार पक्षाची लढत होईल. परळीत युती कि स्वबळ याचा फैसला अद्याप झालेला नाही. अंबाजोगाईत मात्र अधिकृत घोषणा झालेल्या नसल्या तरी राष्ट्रवादी काँग्रेसच्या राजकिशोर मोदी यांच्या विरोधात भाजपकडून नंदकिशोर मुंदडा यांचे नाव निश्‍चित आहे.

अंबाजोगाई नगर पालिकेवर राजकिशोर मोदी यांची 25 वर्षांपासून सत्ता आहे. 15 वर्षे ते स्वत: तर 10 वर्षे त्यांच्या भावजय नगराध्यक्ष होत्या. सुरुवातीला काँग्रेसमध्ये असलेले राजकिशोर मोदी आता राष्ट्रवादी काँग्रेसमध्ये आहेत. एका पालिका निवडणुकीत त्यांनी स्वत:च्या काँग्रेस पक्षाच्या विरोधात आघाडीच्या माध्यमातून निवडणुक लढवत विजय मिळविला होता.

दरम्यान, अंबाजोगाईत मोदी - मुंदडा एकमेकांचे कट्टर राजकिय विरोधक मानले जातात. त्यामुळे आता त्यांच्या विरोधात भाजपचे नंदकिशोर मुंदडा स्वत:च रिंगणात उतरत आहेत. त्यांच्या पत्नी दिवंगत डॉ. विमल मुंदडा पाच वेळा तर त्यांच्या स्नुषा नमिता मुंदडा दुसऱ्यांदा आमदार आहेत. मुंदडांची राजकिय वाटचालही भाजप - राष्ट्रवादी काँग्रेस आणि पुन्हा भाजप अशी आहे. खुद्द मुंदडा यांचा वैयक्तीक जनसंपर्क, संघटन दांडगे आहे.

तर, मोदींनाही नगर पालिकेच्या राजकारणाची आणि शहराची नस चांगलीच ठावूक आहे. मात्र, आता या दोघांनीही विजयाचे गणित जुळवायचे तर पक्षाचे चिन्ह बाजूला ठेवेणे गरजेचे असल्याचे समिकरण पक्षासमोर मांडले आहे. अंबाजोगाईतील मुस्लिम मतदारांची संख्या मोठी असून मोदी व मुंदडा या दोघांचेही या घटकाशी घरोब्याचे संबंध आहेत. मात्र, हा मतदार महायुतीतील कमळ आणि घड्याळाला मतदान करणार नाही, अशी भिती आहे. त्याच बरोबरच मोदींना अंबाजोगाईत राष्ट्रवादी काँग्रेस शरदचंद्र पवार पक्षाचे माजी आमदार पृथवीराज साठे यांना सोबत घ्यायचे आहे.

या दोन प्रमुख कारणांनी दोन्ही नेत्यांनी आपाल्या पक्षांना चिन्ह नको, आघाडीला परवानगी द्या, अशी मागणी केली आहे. पक्षाचा फैसला काय येतो, हे पाहणे औत्सुक्याचे असून निवडणुकीत अंबाजोगाई शहराच्या विकासाचे बरेच प्रश्न व समस्यांवरही खल होणार आहे. प्रामुख्याने शहराच्या कायमस्वरूपी पाणी पुरवठ्यासाठी बुट्टेनाथ साठवण तलावाचा प्रश्न, काळवटी साठवण तलावाच्या उंचीचा वाढवण्याचे प्रस्ताव मंजूर असूनही निधी अभावी रखडला, शहरातील भुयारी गटाराचा प्रश्न, जिल्हा निर्मिती, पर्यटन विकास अशा विविध प्रश्नावर निवडणूक प्रचारात राळ उठेल हे मात्र निश्चित आहे.

FAQs

1. अंबाजोगाईतील नेत्यांनी ‘घड्याळ’ आणि ‘कमळ’ का नाकारले?
→ स्थानिक नेत्यांना राष्ट्रीय पक्षांपासून दूर राहून स्वतंत्र आघाडी निर्माण करायची आहे.

2. या आघाडीचा उद्देश काय आहे?
→ स्थानिक विकास आणि एकसंघ राजकीय नेतृत्व तयार करणे हा या आघाडीचा हेतू आहे.

3. आघाडीच्या चर्चेत कोणते नेते सहभागी आहेत?
→ अंबाजोगाईतील विविध पक्षांचे माजी पदाधिकारी आणि स्थानिक नेते चर्चेत आहेत.

4. या हालचालीचा परिणाम कोणावर होईल?
→ राष्ट्रवादी आणि भाजप दोन्ही पक्षांना स्थानिक पातळीवर मोठा तोटा होऊ शकतो.

5. पुढील निवडणुकीत या आघाडीचा प्रभाव कसा असेल?
→ स्वतंत्र आघाडी तयार झाल्यास स्थानिक राजकीय समीकरणांमध्ये मोठे बदल होण्याची शक्यता आहे.