Amit Deshmukh News: विधानसभेच्या अधिवेशनात गंभीर आरोप; म्हणाले, 'या' शाळांमध्ये मराठी शिकवली जात नाही...

Assembly Session 2026 : राज्याच्या अर्थसंकल्पीय अधिवेशनात काँग्रेस पक्ष सरकारवर तुटून पडला आहे. काँग्रेसचे आमदार अमित देशमुख यांनी अर्थसंकल्पात मुख्यमंत्री देवेंद्र फडणवीस यांनी केलेले दावे खोडून काढत आकडेवारीसह वस्तुस्थिती मांडली. मराठवाड्याचा समतोल विकास, राज्याची पाच ट्रिलियन डाॅलरकडे वाटचाल, महाराष्ट्रावरील कर्जाचा वाढता डोंगर या मुद्यावरून सरकारला घेरण्याचा प्रयत्न केला.

मराठी भाषा सर्व प्रकारचे बोर्ड, भाषा, माध्यमांच्या शाळांना शिकवणे अनिवार्य-सक्तीचे असल्याचे सरकार छातीठोकपणे सांगत आहे. परंतु वस्तुस्थिती वेगळी असून अनेक इतर भाषा व माध्यमांच्या शाळांमध्ये मराठी भाषा शिकवली जात नाही, हे सरकारने स्वीकारावे, अशा शब्दात आमदार अमित देशमुख यांनी टीका केली.

महाराष्ट्रात सर्व माध्यमांच्या आणि सर्व बोर्डांच्या शाळांमध्ये मराठी भाषा सक्तीची आहे असे सांगितले जात असले तरी वस्तुस्थिती मात्र वेगळी आहे, त्यामुळे किमान आगामी शैक्षणिक वर्षापासून तरी मराठी भाषा सक्तीच्या कायद्याची प्रभावी अंमलबजावणी करावी, अशी मागणी प्रश्नोत्तराच्या तासात बोलताना अमित देशमुख यांनी केली.

राज्यातील सर्व शाळांमध्ये मराठी विषय सक्तीचा करण्याबाबतचा प्रश्न आमदार हारून खान यांनी उपस्थित केला होता. या प्रश्नाला शासनाने मोघम उत्तर दिले. महाराष्ट्रात CBSE, ICSE आणि IB बोर्डाच्या तसेच, इंग्रजी, हिंदी, उर्दू, गुजराती, कानडी, व इतर प्रांतातील भाषेच्या माध्यमांच्या अशा अनेक शाळा आहेत जिथे मराठी भाषा शिकवली जात नाही.

ही वस्तुस्थिती शासनाने मान्य करावी आणि किमान आगामी वर्षापासून तरी महाराष्ट्रातील प्रत्येक शाळेत मराठी भाषा अनिवार्य असल्याचा जो कायदा आहे त्या कायद्याची प्रभावी अंमलबजावणी करावी. मागच्या आठवड्यात मराठी भाषा गौरवदिनाचे औचित्य साधून या सभागृहात सदरील मागणी केली होती. आज पुन्हा एकदा ती मागणी करत असल्याचे सांगून सरकार हा विषय गांभीर्याने घेईल, अशी अपेक्षा अमित देशमुख यांनी व्यक्त केली. शालेय शिक्षण मंत्री दादा भुसे यांनी आगामी वर्षात सदरील कायदा प्रभावीपणे राबवला जाईल, असे आश्वासन दिले.