Marathwada Floods: महापुरात बुडालेल्या झेडपीच्या शाळा उभ्या करणार; अजित पवारांच्या आमदारानं जाहीर केली 20 लाखांची मदत

Marathwada Floods: राज्यातील मराठवाड्यासह पश्चिम महाराष्ट्राला मुसळधार पावसानं अक्षरशः झोडपून काढलं आहे. यामध्ये लोकांच्या शेतातली उभी पिकं वाहून गेली आहेत. शेतातली माती, दुभती जनावरं वाहून गेली आहेत. जिल्हा परिषदांच्या शाळांचं जबरदस्त नुकसान झालं आहे.

यापार्श्वभूमीवर महाराष्ट्रातील सर्वच राजकीय पक्षांनी आपल्या आमदारांना पूरग्रस्त बांधवांना मदतीचं आवाहन केलं आहे. त्याला अनुसरुन राष्ट्रवादीचे प्रवक्ते अमोल मिटकरी यांनी आपल्या आमदार निधीतून २० लाख रुपयांची मदत जाहीर केली आहे. झेडीपीच्या उद्ध्वस्त झालेल्या शाळा उभारण्यासाठी हा निधी खर्च केला जाणार असल्याचं त्यांनी म्हटलं आहे.

मदत सोशल मीडियातून जाहीर करताना अमोल मिटकरींनी ट्विट केलं की, "उपमुख्यमंत्री अजितदादांच्या सूचनेवरून माझ्या स्थानिक आमादर विकास निधीअंतर्गत धाराशिव जिल्ह्यातील अतिवृष्टी आपत्तीनं बाधित कळंब, भूम, परंडा, वाशी, उमरगा या तालुक्यातील अतिबाधित प्रत्येकी एक जि. प. शाळा साहित्य खरेदीसाठी प्रत्येकी ३ लाखाप्रमाणं एकूण २० लक्ष रुपयांची मदत मी जाहीर करतोय.

दरम्यान, भाजप, काँग्रेस, एकनाथ शिंदेंची शिवसेना आणि अजित पवारांची राष्ट्रवादी काँग्रेस या पक्षांनी आपल्या आमदारांना एक महिन्याचं वेतन हे पूरग्रस्त नागरिकांच्या मदतीसाठी देण्याचं आवाहन करण्यात आलं आहे. त्यानुसार हळूहळू ही मदत जाहीर केली जात आहे. पण अद्याप कुठल्या आमदारानं नेमकी किती मदत दिली किंवा जाहीर केली हे समोर आलेलं नाही. पण आमदारांच्या बरोबरच समाजातील काही उद्योगपती, कलाकार मंडळी तसंच सर्वसामान्य नागरिकांनाही मदतीचा हात पुढे केला आहे.