Ashok Chavan-Pratap Patil Chikhlikar : अशोक चव्हाण यांच्याकडून चिखलीकरांची विकेट! मटका किंग अन्वर खानला चोवीस तासात राष्ट्रवादीतून काढले!

Nanded Political News : राष्ट्रवादी काँग्रेस पक्षाला नांदेड जिल्ह्यात एक नंबवर नेण्यासाठीच्या स्पर्धेत प्रताप पाटील चिखलीकर यांनी आघाडी घेतली आहे. दर महिन्याला अजित पवारांना जिल्ह्यात बोलावून मोठ्या नेत्यांचे प्रवेश सोहळे होत असल्याने चिखलीकरांची जिल्ह्यात काॅलर टाईट झाली. मात्र सुसाट निघालेल्या चिखलकरांनी एक चूक केली आणि त्यांचे राजकीय प्रतिस्पर्धी असलेल्या अशोक चव्हाण यांनी त्यांची विकेट काढली.

अन्वर अली खान यांना प्रताप पाटील चिखलीकर (Pratap Patil Chikhlikar) यांनी नुकताच राष्ट्रवादी काँग्रेस पक्षात प्रवेश दिला होता. स्थानिक पातळीवर हा प्रवेश करून घेण्यात आला होता. मात्र या प्रवेशानंतर राष्ट्रवादी काँग्रेस पक्षाने एका मटका किंग आणि मकोका सारखे गुन्हे प्रस्तावित असणाऱ्या गुन्हेगाराला प्रवेश कसा दिला? अशी चर्चा जिल्ह्यात सुरू झाली होती. विशेष म्हणजे भाजपाचे खासदार अशोक चव्हाण यांनी या विषयावर भाष्य करत आमदार प्रताप पाटील चिखलीकर यांच्यावर निशाणा साधला होता.

स्थानिक नेतृत्वाने अजित पवारांना अंधारात ठेवून चुकीच्या लोकांना पक्ष प्रवेश दिला असल्याचे सांगत चिखलीकरांची कोंडी गेली होती. अजित पवारांना मी दोष देत नाही असे सांगत अशोक चव्हाण (Ashok Chavan) यांनी चिखलीकर चुकीच्या लोकांना पक्षात प्रवेश देत असल्याचा आरोप केला होता. त्यानंतर सुत्रे हलली आणि चोवीस तासाच्या आतच मटका किंग अन्वर अली खान यांना राष्ट्रवादी काँग्रेस पक्षातून बाहेरचा रस्ता दाखवण्यात आला आहे. आमदार प्रताप पाटील चिखलीकर यांनी एका वृत्तवाहिनाला प्रतिक्रिया देताना आपली चुक झाल्याची कबुली देखील दिली आहे.

अन्वर अली खान हा नांदेड शहरातील मटका किंग, गुंड म्हणून ओळखला जातो. काल चिखलीकर यांच्या उपस्थितीत त्याचा राष्ट्रवादी काँग्रेस पक्षात प्रवेश झाला होता. चिखलीकर यांच्या निवासस्थानी हा प्रवेश झाला होता. अन्वर अली खान याच्यावर मारहाण, बळजबरी जमिनीवर कब्जा करणे, बेकादेशीर शस्त्र बागळणे, हवेत गोळीबार, बायो डीझेल विकल्याचे अनेक गुन्हे दाखल आहेत. मटका किंग म्हणून तो जिल्ह्यात ओळखला जातो. अशा गुन्हेगारी प्रवृत्तीच्या माणसाला पक्षात प्रवेश कसा दिला? असा सवाल केला जात होता.

त्यानंतर आज चिखलीकरांनी आपली चूक झाल्याचे मान्य करत अन्वर अली खान याला पक्षातून काढून टाकल्याचे सांगत चूक दुरूस्त केल्याचे म्हटले आहे. या एका चुकीची मोठी किंमत चिखलीकर यांना भविष्यात चुकवावी लागू शकते. अशोक चव्हाण या आपल्या राजकीय प्रतिस्पर्ध्यावर मात करण्याच्या शर्यतीत चिखलीकरांनी एक चुकीचे पाऊल टाकताच अनुभवी अशोक चव्हाण यांनी त्यांची विकेट काढल्याची चर्चा या निमित्ताने होत आहे.