Beed Death Case : बीडमध्ये चाललंय काय? आधी सरकारी वकिलाची आत्महत्या अन् आता 25 वर्षीय श्रीनाथ कराडने संपवलं आयुष्य

Beed News, 23 Aug : बीडच्या वडवणी न्यायालयात बुधवारी (ता. 20) सरकारी वकील विनायक चंदेल यांनी गळफास घेऊन आत्महत्या केल्याची धक्कादायक घटना घडली होती. या आत्महत्ये प्रकरणी चंदेल यांच्या सुसाईट नोट आणि त्यांच्या मुलाने दिलेल्या माहितीनुसार एका न्यायाधीशाच्या विरोधात गुन्हा दाखल करण्यात आला आहे.

अशातच आता बीडमधील एका तरुणाने संस्था चालकाच्या त्रासाला कंटाळून आत्महत्या केल्याची धक्कादायक घटना घडली आहे. परळी तालुक्यातील दागौळ येथील एका तरुणाने राहत्या घरी गळफास घेऊन आपलं आयुष्य संपवलं आहे.

मिळलेल्या माहितीनुसार, परळी तालुक्यातील नंदागौळ येथील रहिवासी श्रीनाथ गोविंद कराड या 25 वर्षीय तरुणाला पूर्वी कार्यरत असणाऱ्या केज येथील शैक्षणिक संस्था चालकाचालकाच्या त्रासाला कंटाळूनच श्रीनाथ कराडने हे टोकाचं पाऊल उचलल्याचा आरोप केला जात आहे.

श्रीनाथ सध्या वसंत नगर येथील प्राथमिक शाळेत अनुकंपा तत्त्वावर सेवक म्हणून महिन्यापूर्वी कामाला लागला होता. याआधी तो केजमधील एका निवासी शाळेत चतुर्थश्रेणी कर्मचारी म्हणून कार्यरत होता. मात्र, या ठिकाणी जवळपास 12 वर्षे झाले तरी त्याला संस्थाचालकांनी कायमस्वरूपी करून घेतले नाही.

त्यामुळे तो आर्थिक आणि मानसिक त्रासात असल्याचं बोललं जात आहे. अशातच त्याने काल त्याने नंदाघोळ येथे आपल्या राहत्या घरी आत्महत्या केली. दरम्यान, या आत्महत्येच्या घटनेचा पुढील तपास परळी ग्रामीण पोलीस करत आहेत.