Beed Hostel Scam: बीडमध्ये वसतिगृह घोटाळ्याचा पर्दाफाश! मुख्याध्यापकानं विद्यार्थ्यांचा...; काय आहे प्रकरण?

Beed Hostel Scam: बीड जिल्हा हा राज्यात गुन्हेगारी कृत्यांचा अड्डा बनल्यासारखी स्थिती बनली आहे. आधीच संतोष देशमुख प्रकरणामुळं बदनमा झालेल्या बीडमध्ये आता नवा वसतिगृह घोटाळा समोर आल्यानं खळबळ उडाली आहे. या प्रकरणात गुरुस्थानी मानल्या जाणाऱ्या शाळेच्या मुख्याध्यापकानंच मोठा भ्रष्टाचार केला आहे. वसतिगृहाच्या नावाखाली या मुख्याध्यापकानं लाखोंचा शासकीय निधी गिळंकृत केला आहे.

नेमकं प्रकरण काय?

बीडमधील एका शाळेच्या मुख्याध्यापकानं असं लिहून दिलंय की, आमच्याकडं वसतिगृह नाही, तरीपण त्या वसतिगृहाच्या नावानं या मुख्याध्यापकानं शासकीय बिलं उचलली आहेत. केज तालुक्यात २९ वसतिगृह आहेत त्या वसतिगृहावर १०० विद्यार्थी असतील तर २०० ते २५० विद्यार्थी असल्याचं दाखवून त्यांनी शासकीय बिलं उचलली आहेत, असा आरोप तक्रारदार बाबुराव म्हस्के यांनी केला आहे.

बनावट बिलं काढल्याचा प्रशासनाचा दुजोरा

काही तक्रारी माझ्यासमोर आल्या आहेत, विद्यार्थी संख्या नसतानाही अधिकची रक्कम घेतलेली आहे असं तक्रारीचं स्वरुप आहे. त्यासाठी आपल्या यंत्रणा देखील आहेत, जानेवारी महिन्यात क्रॉस तपासणी करुन देखील आपण पैसे वाटप केले होते. याप्रकरणात जर चुकीचं काही घडलं असेल तर शंभर टक्के संबंधित अधकाऱ्यावर कारवाई होईल, असं आश्वासनं या प्रकरणावर प्रतिक्रिया देताना बीड जिल्हा परिषदेच्या कार्यकारी अधिकाऱ्यांनी दिली आहे.