Narayan Kuche Audio News : शेतकऱ्याचे अकाऊंट फ्रीज; भाजप आमदाराचा संताप, बँक मॅनेजरला शिवराळ भाषेत झापले!

BJP News : लोकांच्या प्रश्नावर एखाद्याला जाब विचारणे, दम देणे असे प्रकार राजकारणात सातत्याने घडत असतात. त्यात तक्रारदार जर मतदारसंघातील शेतकरी असेल तर लोकप्रतिनिधी अधिकच संवेदनशील होतात. पण भावनेच्या भरात शिवराळ भाषा, दमदाटी केली जाते आणि मग अडचणी वाढतात. असाच काहीसा प्रकार भाजपाचे आमदार नारायण कुचे यांच्या बाबतीत समोर आला आहे.

पिक कर्ज थकीत असल्यामुळे शेतकऱ्याचे खाते फ्रीज करून त्यांची मुदत ठेव परत करण्यास नकार देणाऱ्या यूनियन बँकेच्या व्यवस्थापकाला बदनापूरचे आमदार नारायण कुचे (Narayan Kuche) यांनी फोनवरून चांगलाच दम भरला. शिवीगाळ करत झालेल्या या संभाषणाची आॅडिओ क्लिप समाज माध्यमांवर व्हायरल झाली आणि याची एकच चर्चा सुरू झाली. संतापाच्या भरात आपण बोलून गेलो, अशी प्रतिक्रिया आमदार नारायण कुचे यांनी दिली आहे.

जामखेड येथिल युनियन बँक आँफ इंडियाचे शाखा व्यवस्थापक ललित शिरलेकर यांनी भोकरवाडी येथिल शेतकरी यांच्या मुदत ठेवीची रक्कम पिक कर्जाचे खाते एनपीए असल्याच्या कारणाने देण्यास असमर्थता दर्शवली होती. (BJP) या संदर्भात आमदार नारायण कुचे यांनी यापूर्वीही संबंधित शाखा व्यवस्थापकांना फोन केला होता. परंतु ते आपल्या हातात नाही, आपण मुख्य कार्यालयाला कळवले असल्याचे त्यांनी सांगितले होते.

याशिवाय जामखेड येथिल रोहित सोनाजी धुळे यांनी बँकेकडे ग्राहक सेवा केंद्र मिळावे यासाठी अर्ज केला होता. त्यासाठीही नारायण कुचे यांनी व्यवस्थापक शिरलेकर यांना फोन केला होता. वारंवार फोन करून शेतकऱ्याची मुदत ठेव आणि धुळे यांना ग्राहक सेवा केंद्र देण्यास टाळाटाळ केली जात असल्याने कुचे यांचा पारा चढला. त्यानंतर कुचे यांनी बँक व्यवस्थापकास भ्रमणध्वनीवरून शिवीगाळ केली. तुमच्या मुजोरीमुळे शेतकरी आत्महत्या करत आहेत, मी बँकेत येऊ का? असे म्हणत धमकावले.

दरम्यान, या संदर्भात कुठलीही तक्रार दाखल करण्यात आलेली नाही. बँक व्यवस्थापक सिरलेकर यांच्याशी संपर्क केला असता,त्यांनी प्रतिसाद दिला नाही. तर आमदार नारायण कुचे यांनी मी यापुर्वीही व्यवस्थापक यांना दोन-तीन वेळा शेतकऱ्याच्या तक्रारीवरुन संपर्क केला होता. बँक व्यवस्थापकाने शेतकऱ्याचे बचत खाते होल्ड करून अडवणुक केली. यामुळे रागाच्या भरात मी व्यवस्थापक यांना बोललो,असे सांगितले.