Sanjay Gaikwad : डिफेंडरमुळे गोत्यात आलेल्या संजय गायकवाडांसाठी ठेकेदार ढवळे मैदानात; म्हणाले, 'इम्प्रेशनसाठी आमदाराचा सिम्बॉल, कर्ज काढून...'

Buldhana Defender Car Controversy : बुलढाण्याचे भाजप जिल्हाध्यक्ष विजय शिंदे यांनी महायुतीत मित्रपक्ष असलेल्या शिंदेंच्या शिवसेनेचे आमदार संजय गायकवाड यांच्यावर गंभीर आरोप केले आहेत. आमदार गायकवाड यांनी कमिशनमधून दीड कोटींची डिफेंडर कार आणल्याचा आरोप त्यांनी केला होता.

या डिफेंडर प्रकरणावरून नव्या वादाला तोंड फुटलं होतं शिवाय आमदार गायकवाड वादाच्या भोवऱ्यात अडकले होते. अशातच आता संजय गायकवाड यांच्यावर आरोप होताच डिफेंडर कारचे मालक ठेकेदार निलेश ढवळेंनी या प्रकरणावर प्रतिक्रिया देत गायकवाडांची पाठराखण केली आहे.

भाजप जिल्हाध्यक्षांचा नेमका आरोप काय?

बुलढाण्याचे भाजपचे जिल्हाध्यक्ष विजय शिंदे म्हणाले, बुलढाण्यात बेडकासारख भाषणातून युती पाहिजे असं म्हणणाऱ्या लोकप्रतिनिधीने काल दीड कोटींची डिफेंडर आणली. ती एका कॉन्ट्रॅक्टरच्या नावावर असून ती कोणत्या कामाच्या कमिशनमुळे मिळाली आहे, याची चौकशी झाली पाहिजे. मतदारांना वेश्यांपेक्षा खराब म्हणणाऱ्या लोकप्रतिनिधीला लोक नाकारतील म्हणून भाजपचाच विचार व्हावा अन्यथा युती नाही.'

दरम्यान, आता या सर्व प्रकरणावरून डिफेंडर कारचे मालक ठेकेदार निलेश ढवळेंनी प्रतिक्रिया दिली. ते म्हणाले, 'मला गाड्यांचा छंद असून मी ही कार कर्ज काढून खरेदी केली आहे. शिवाय ती कोणत्याही कमिशन स्वरूपात कार आमदार गायकवाडांना दिली नाही. गायकवाड माझे नातेवाईक आहेत, त्याचे आम्ही कार्यकर्ते आहोत.

यावेळी गाडीचा नंबर सारखा कसा? असं विचारलं असता ते म्हणाले, 'त्याच्या कार्यकर्त्यांच्या गाडीचे नंबर सुद्धा सारखेच आहेत आणि गाडीवर आमदाराचा सिम्बॉल जो टाकला तो इम्प्रेशन टाकण्यासाठी टाकला असून दिवाळीनंतर गाडी परत घेणार आहे आणि याची कोणतीही चौकशी झाली तरी मी सामोरे जाण्यास तयार आहे, असं ढवळे यांनी गायकवाडांची पाठराखण केली.

दरम्यान, आमदार संजय गायकवाड यांनीही डिफेंडर कार निलेश ढवळे यांच्या मालकीची असून ते त्यांचे नातेवाईक तसेच पक्षाचे कार्यकर्ते असल्याचं सांगितलं आहे. शिवाय त्यांनी स्वतः ही गाडी काही काळ वापरण्यासाठी आणल्याचं सांगितलं आहे.