BJP Election Strategy : ZP साठी भाजपचं मायक्रो प्लॅनिंग; उमेदवार निवडीसाठीची प्रोसेस तयार

Maharashtra local body elections : आगामी जिल्हा परिषद, पंचायत समितीची निवडणुकीसाठी सर्वच राजकीय पक्षांनी आतापासूनच जोरदार तयारी सुरू केली आहे. प्रत्येक पक्षाकडून या निवडणुकांमध्ये विजयी होईल असा उमेदवार शोधण्याची मोहीम सुरू केली आहे.

स्थानिकच्या निवडणुकीत आपलाच उमेदवार विजयी व्हावा यासाठी मित्र पक्षांमध्येच स्पर्धा सुरू झाल्याचं दिसत आहे. तर महायुतीत विधानसभेत मोठा भाऊ ठरलेल्या भाजपने जिल्हा परिषद, पंचायत समिती निवडणुकीतही आपल्या जास्त जागा याव्यात यासाठी रणनीती आखली आहे.

यासाठी भाजपने योग्य उमेदवारांचा शोध घेण्याची जबाबदारी निवडणूक संचलन समितीकडे दिली आहे. या समितीकडून झेडपी गटासाठी 5 तर पंचायत समिती गणासाठी प्रत्येकी 2 नावे मागितली असून दिवाळीनंतर होणाऱ्या कोअर कमेटीच्या बैठकीत या नावावर चर्चा होणार आहे.

त्यामुळे आता भाजपने प्रत्येक गट आणि गणावर लक्ष केंद्रित केलं असून स्थानिक स्वराज्य संस्थांवर आपलीच सत्ता राहावी, यासाठी भाजपने तयारी सुरू केल्याचं दिसत आहे. ही 'निवडणूक संचलन समिती' प्रत्येक तालुक्यात असेल. ज्यामध्ये ज्येष्ठ पदाधिकारी, निवडणूक लढणार नसलेल्या पदाधिकार्‍यांचा समावेश करण्यात आला आहे.

या समितीला त्या-त्या भागातील राजकीय, सामाजिक स्थितीचा आढावा घेऊन संभाव्य उमेदवारांची माहिती गोळा करावी लागणार आहे. या माहितीच्या आधारे जिल्हा परिषदेसाठी पाच आणि पंचायत समिती गणाकरीता दोन नावे कोअर कमेटीकडे पाठवावी लागणार आहेत.

निवडणूक समितीने पाठवलेल्या नावावर कोअर कमिटीत चर्चा होईल यानंतर उमेदवार कोण हे ठरवलं जाणार आहेत. शिवाय समिती ज्या उमेदवाराची शिफारस कोअर कमिटीकडे करेल त्याचे सकारात्मक आणि नकारात्मक मुद्देही समितीला द्यावे लागणार आहेत. यामुळे भाजपने निवडणुकीसाठी तगडं प्लॅनिंग आतापासून सुरू केल्याचं दिसत आहे.