Chakur Municipal Council : चाकूर नगरपालिकेत मोठ्या राजकीय घडामोडी! नगराध्यक्ष निवडणुकीत राष्ट्रवादीची सरशी; नाव निश्चित, अर्जही दाखल

Latur Poitics : प्रशांत शेटे

चाकूर नगरपालिकेच्या रिक्त झालेल्या नगराध्यक्षपदासाठी सोमवारी (ता.13) राष्ट्रवादी काँग्रेस पक्षाचे नगरसेवक भागवत फुले यांचा एकमेव अर्ज दाखल झाला. त्यामुळे त्यांची बिनविरोध निवड निश्चित मानली जात आहे. अब्दुल करीम गुळवे यांनी पदाचा राजीनामा दिल्यानंतर रिक्त झालेल्या नगराध्यक्षपदाच्या निवडीचा कार्यक्रम जिल्हाधिकारी कार्यालयाकडून जाहीर करण्यात आला आहे.

या निवड प्रक्रियेनुसार सोमवारी उमेदवारी अर्ज दाखल करण्याच्या दिवशी राष्ट्रवादी काँग्रेस पक्षाच्या वतीने नगरसेवक भागवत फुले यांनी मुख्याधिकारी प्रतीक लंबे यांच्याकडे उमेदवारी अर्ज दाखल केला. नगराध्यक्षपदासाठी अर्ज दाखल करण्याच्या अंतिम मुदतीपर्यंत भागवत फुले यांचाच एकमेव अर्ज दाखल झाल्याने त्यांच्या नगराध्यक्षपदी बिनविरोध निवडीवर जवळपास शिक्कामोर्तब झाले आहे.

त्यामुळे चाकूर नगरपंचायतीला लवकरच नवे नगराध्यक्ष मिळणार आहेत. सहकारमंत्री बाबासाहेब पाटील यांच्या समवेत सर्व नगरसेवकांची बैठक होऊन फुले यांच्या नावावर एकमत झालेले आहे. नगराध्यक्षपदाच्या निवडीसाठी शुक्रवारी (ता.17) दुपारी बारा वाजता नगरपंचायत सभागृहात विशेष बैठकीचे आयोजन करण्यात आले आहे.

उपविभागीय अधिकारी मंजूषा लटपटे यांच्या अध्यक्षतेखाली ही बैठक होणार असून त्यामध्ये नगराध्यक्षपदाची अधिकृत घोषणा करण्यात येणार आहे. अब्दुल करीम गुळवे यांच्या राजीनाम्यानंतर नगराध्यक्षपदाच्या निवडीकडे राजकीय वर्तुळासह नागरिकांचे लक्ष लागले होते. राष्ट्रवादी काँग्रेसकडून भागवत फुले यांचाच एकमेव अर्ज दाखल झाल्याने निवडणुकीची गरज भासणार नाही. युवा नेतृत्वामुळे नगरपंचायतीच्या पुढील विकासकामांना गती मिळेल अशी अपेक्षा व्यक्त होत आहे.

नगराध्यक्षपदाचा अर्ज दाखल करताना जिल्हा परिषदेचे उपाध्यक्ष दयानंद सुरवसे, माजी नगराध्यक्ष करीम गुळवे, नगरसेवक मिलिंद महालिंगे, जिल्हा परिषद सदस्य भानुदास पोटे, उषा सोनकांबळे, नगरसेवक विलासराव पाटील, मच्छींद्र नागरगोजे, उपसभापती भुजंग शिंदे, सरपंच डॉ. भालचंद्र चाटे, शिवाजी काळे, संदीप शेटे आदी उपस्थित होते.