Latur Political : देशमुखांचा `काॅन्फिडन्स`, लातूरचा खासदार काॅंग्रेसचाच..

Marathwada : निलंगा येथील काॅंग्रेस कार्यकर्ता मेळावा आणि धोंडेजेवण कार्यक्रमात जोरदार बॅटिंग करत धमाल उडवून देणाऱ्या माजी मंत्री अमित देशमुख यांचा `काॅन्फिडन्स`, सध्या चांगलाच वाढला. (Latur Political) लातूर लोकसभा मतदारसंघातील काँग्रेस पक्षाचे निरीक्षक आमदार संग्राम थोपटे यांच्या प्रमुख उपस्थितीत झालेल्या बैठकीनंतर पत्रकरांशी बोलतांना तो दिसून आला.

लातूरचा (Latur) पुढचा खासदार निश्चितपणे काँग्रेस पक्षाचा निवडून येईल, शिवाय विधानसभा आमदारांची संख्या ही वाढणार असल्याचा दावा देशमुख (Amit Deshmukh) यांनी केला. लातूर लोकसभा मतदारसंघाचा विचार केला तर सर्वाधिक काळ या जिल्ह्यावर काॅंग्रेसचे वर्चस्व राहिले आहे. तुळशीराम कांबळे, शिवराज पाटील चाकूरकर आणि जयंत आवळे यांनी आतापर्यंत या मतदारसंघाचे प्रतिनिधित्व केले आहे.

चाकूरकर यांच्या नावावर तर सातवेळा निवडून जाण्याचा विक्रम आहे. (Congress) २००४ मध्ये लातूरकरांनी खऱ्या अर्थाने भाकरी फिरवली आणि भाजपच्या रुपाताई पाटील निलंगेकर खासदार झाल्या. पण पुढच्याच निवडणुकीत म्हणजे २००९ मध्ये काॅंग्रेसने कमबॅक करत जयंत आवळे यांना निवडूनआणले. पण ही कामगिरी काॅंग्रेसला २०१४ च्या मोदी लाटेत कायम राखता आली नाही. भाजपच्या सुनिल गायकवाड यांनी लातूरमधून विजय मिळवला.

मोदी लाटेचे तडाखे काॅंग्रेसला २०१९ मध्येही बसले. नवख्या सुधाकर श्रृंगारे यांनी विजय मिळवत काॅंग्रेच्या मच्छिंद कामंत यांचा दणदणीत पराभव केला होता. त्यामुळे कर्नाटक राज्यातील विजयामुळे देशमुखांचा आत्मविश्वास बळावला असला तरी मतदारसंघातील वस्तुस्थिती त्यांच्या बाजूने नाही.

२०१९ च्या विधानसभा निवडणुकीचा विचार केला तर सध्या लातूर शहर आणि ग्रामीण हे दोन मतदारसंघ सोडले तर जिल्ह्यातील चार मतदारसंघात भाजप, राष्ट्रवादी तर एका जागेवर पीडबल्यूपीआय पक्षाचा आमदार आहे. त्यामुळे अमित देशमुख यांनी लोकसभा निरीक्षकांना खूष करण्यासाठी तर हा दावा केला नाही ना ? अशी चर्चा होत आहे.

Edited By : Jagdish Pansare