Dhananjay Munde: "ती बीडची आहे अन् मुंडे आहे म्हणून जर..."; डॉक्टर तरुणीच्या अत्याचार अन् आत्महत्या प्रकरणात धनंजय मुंडे आक्रमक

Dhananjay Munde: फलटणच्या उपजिल्हा रुग्णालयातील एका महिला वैद्यकीय अधिकाऱ्याच्या अत्याचार आणि मृत्यू प्रकरणात आता माजी मंत्री आणि राष्ट्रवादीचे परळीचे आमदार धनंजय मुंडे यांनी भाष्य केलं आहे. कारण संबंधीत पीडिता ही बीडची असल्यानं धनंजय मुंडे यांनी याप्रकरणी थेट मुख्यमंत्र्यांना पत्र लिहिणार असल्याचंही म्हटलं आहे. ट्विट करत त्यांनी याप्रकरणात भाष्य केलं आहे.

धनंजय मुंडेंनी ट्विट केलं की, सातारा जिल्ह्यातील फलटण इथं रुग्णसेवेत असलेल्या व मूळच्या बीड जिल्ह्यातील वडवणी तालुक्यातील महिला डॉक्टर यांच्याबाबत घडलेली घटना अत्यंत दुर्दैवी आहे. माझ्या त्या डॉक्टर भगिनीला भावपूर्ण श्रद्धांजली. तिच्या अकाली निधनाने कुटुंबियांवर कोसळलेल्या दुःखात मी सहभागी आहे. या घटनेतील दोषींना कठोर शासन व्हावे, तसेच ती मुंडे आहे व बीडची आहे म्हणून तिने केलेल्या तक्रारी वरिष्ठांनी डावलल्या असतील तर हे अतिशय गंभीर आहे. या संपूर्ण प्रकरणाची स्वतंत्र एसआयटी नेमून चौकशी करण्यात यावी, तसेच हे प्रकरण जलदगती न्यायालयात चालवले जावे व दोषींना कडक शासन व्हावे, याबाबत उद्या राज्याचे मुख्यमंत्री महोदयांना पत्र देणार आहे.

काय आहे प्रकरण?

सातारा जिल्ह्यातील फलटण उपजिल्हा रुग्णालयातील एका महिला डॉक्टरनं आपल्या हातावर सुसाईड नोट लिहून जीवन संपवलं आहे. या प्रकरणातील धक्कादायक बाब म्हणजे एका पोलीस अधिकाऱ्यानं (उपनिरिक्षक) तिच्यावर लैंगिक अत्याचार केल्याचं तसंच ती भाड्याच्या खोलीत राहत असलेल्या घरमालकाच्या मुलानंही तिला शाररिक आणि मानसिक त्रास दिल्याचं तिनं आपल्या नोटमध्ये नमूद केलं आहे. ही पीडिता मूळची बीड जिल्ह्यातील रहिवासी आहे. या प्रकरणाची राज्यात सर्वत्र चर्चा सुरु झाल्यानंतर महिला आयोगानंही याची गंभीर दखल घेतली आहे.