Politics : जखमी असतानाही धनंजय मुंडे पक्षासाठी मैदानात; म्हणाले, 'राह मे खतरे कितने भी हो...'

Dhananjay Munde : राष्ट्रवादीचे नेते धनंजय मुंडे हे गेल्या काही दिवसांपासून उपचार घेत आहेत. त्यांचा काही दिवसांपूर्वी अपघात झाला. यामध्ये त्यांना दुखापत झालेली आहे. यामुळे त्यांना कोणत्याही कार्यक्रमांना उपस्थिती लावता येत नाही. पण त्यांनी आज विधान परिषदेच्या शिक्षक तसेच पदवीधर मतदारसंघ निवडणुकीच्या पार्श्वभूमीवर व्हिडिओ कॉन्फरन्सच्या माध्यमातून थेट प्रचाराचे भाषण केले आहे.

औरंगाबाद (Aurangabad) शिक्षक मतदारसंघाचे राष्ट्रवादीचे (NCP) उमेदवार विक्रम काळे यांच्या प्रचाराचे भाषण व्हिडिओ कॉन्फरन्सच्या माध्यमातून केले. त्यामुळे त्यांच्या या भाषणाची चांगलीच चर्चा रंगली आहे. एवढंच नाही तर त्यांनी भाषणादरम्यान शेरो-शायरी देखील केली.

धनंजय मुंडे (Dhananjay Munde) म्हणाले, ''भाजपच्या सात पिढ्यांना देखील विक्रम काळे कसे जिंकतील हे कळणार सुद्धा नाही. विक्रम काळेंना तीन वेळा निवडणून दिले आहे आणि आता चौथ्या वेळेस देखील ते निवडून येतील असा विश्वास आहे. या निवडणुकीत कोण-कोण कोठून मतदान करतं? हे फक्त मतदारांनाच माहिती असतं. मतदार हे विक्रम काळे यांना मतं देतील, असा विश्वास मला आहे'', असं मुंडे यावेळी म्हणाले.

यावेळी भाषणादरम्यान मुंडे म्हणाले, ''राह मे खतरे कितने भी हो लेकीन डरता कौन है. मौत कल आती है आज आ जाए डरता कोन है. तेरे लष्कर के मुकाबले मै अकेला हूँ, फैसला मैदान मे होता है, मरता कौन है...'' असं म्हणत त्यांनी जोरदार भाषण केलं.

दरम्यान, धनंजय मुंडे यांची प्रकृती ठीक नसतानाही त्यांनी पक्षाच्या उमेदवाराचा व्हिडिओ कॉन्फरन्स माध्यमातून प्रचार केला. त्यामुळे त्यांच्या या भाषणाची चर्चा होत आहे.

तसेच पदवीधर आणि शिक्षक मतदारसंघ निवडणुकाच्या जाहीर प्रचाराचा आज शेवटचा दिवस होता. गेल्या काही दिवसांपासून पदवीधर आणि शिक्षक मतदारसंघात अनेक राजकीय घडामोडी पाहायला मिळाल्या. त्यामुळे आता निवडणुकीच्या निकालानंतर कोणत्या पक्षाचे उमेदवार बाजी मारतात? हे पाहणं महत्वाचं असणार आहे.