Dhiraj Deshmukh:केंद्राने सोयापेंडवर लावलेली 'स्टॉक लिमिट'राज्यात लागू करू नका

लातूर : केंद्र सरकारने सोयापेंडवर लावलेली 'स्टॉक लिमिट' राज्य सरकारने लागू करु नये, अशी मागणी 'लातूर ग्रामीण'चे आमदार धिरज देशमुख (Dhiraj Deshmukh)यांनी सभागृहात केली. महाविकास आघाडी सरकार कायमच शेतकऱ्यांच्या पाठीशी खंबीरपणे उभे आहे. (Latur) या प्रश्नाबाबतही सरकारने शेतकऱ्यांच्या (Marathwada) बाजूने उभे रहावे, अशी अपेक्षाही त्यांनी व्यक्त केली.

आठवडाभरापूर्वी केंद्र सरकारने सोयापेंडवर 'स्टॉक लिमिट' लागू करण्याचा निर्णय घेतला. या निर्णयामुळे सोयाबीनचे भाव पुन्हा पडणार असल्याने शेतकऱ्यांमध्ये चिंतेचे वातावरण पसरले. या पार्श्वभूमीवर धिरज देशमुख यांनी अधिवेशनात या विषयाकडे सभागृहाचे लक्ष वेधले.

धिरज देशमुख म्हणाले, मराठवाड्यात दरवर्षी मोठ्या प्रमाणात सोयाबीनचे उत्पादन होते. पण, यंदाच्या अतिवृष्टीमुळे शेतकऱ्यांच्या सोयाबीनचे मोठे नुकसान झाले. अशा अडचणीच्या काळात केंद्र सरकारने सोयापेंडवर 'स्टॉक लिमिट' लावण्याचा जाचक निर्णय घेतला. त्यामुळे शेतकरी चांगलेच अडचणीत आले.

म्हणून सोयापेंडच्या 'स्टॉक लिमिट'ची राज्यात अंमलबजावणी करू नका. दोन महिन्यांपूर्वी केंद्र सरकारने अशीच 'स्टॉक लिमिट' लावली होती. त्यावेळी मध्यप्रदेश आणि महाराष्ट्र सरकारने ती आपापल्या राज्यांत लागू केली नव्हती. त्यामुळे त्यावेळी बाजारात सोयाबीनचे भाव टिकून राहिले आणि शेतकऱ्यांना दिलासा मिळाला.

आता पुन्हा एकदा केंद्र सरकारने 'स्टॉक लिमिट' लावली आहे. त्यामुळे राज्य सरकारला पुन्हा एकदा शेतकऱ्यांच्या बाजूने उभे रहावे लागेल. जेणेकरून सोयाबीनचे भाव टिकून राहतील आणि हवालदिल झालेल्या, आर्थिक संकटात सापडलेल्या बळीराजाला पुन्हा एकदा दिलासा मिळेल, असे आवाहनही देशमुख यांनी केले.