Marathwada news : मुदत संपलेल्या ग्रामपंचायतींचा कारभार सुरळीत चालविण्यासाठी नियुक्त केलेल्या प्रशासकांवर राजकीय हस्तक्षेपाचे सावट निर्माण झाले आहे. जिल्ह्यातील 605 ग्रामपंचायतींवर नियुक्त केलेल्या प्रशासकांपैकी तब्बल 51 प्रशासक आतापर्यंत बदलले आहेत.
काही राजकीय पुढाऱ्यांनी आपल्या विरोधी गटातील अथवा नेत्यांच्या मर्जीतील अधिकाऱ्यांची नियुक्ती झाल्याचा आक्षेप घेतल्याने या बदल्या कराव्या लागल्याची माहिती सूत्रांनी दिली. राज्य शासनाच्या अधिसूचनेनुसार जिल्ह्यातील ६०५ ग्रामपंचायतींवर १० सप्टेंबरला प्रशासक नियुक्त करण्यात आले.
पंचायत समित्यांच्या गटविकास अधिकाऱ्यांनी सुचविलेल्या विस्तार अधिकारी, शाखा अभियंते, केंद्रप्रमुख आणि मुख्याध्यापकांकडेही ग्रामपंचायतींचा कारभार सोपविण्यात आला. त्यांना ग्रामपंचायतीच्या खर्चासह प्रशासकीय कामकाजाचे अधिकारही दिले आहेत. मात्र, प्रशासकांच्या नियुक्त्या होताच त्यावर राजकीय हरकतींचा सिलसिला सुरू झाला.
संबंधित अधिकारी एखाद्या राजकीय पक्षाच्या किंवा गटाच्या जवळचा असल्याचा दावा करत काही नेत्यांकडून नवीन प्रशासकांच्या नियुक्तीसाठी शिफारशी करण्यात आल्या. त्यानंतर प्रशासनाकडे आलेल्या तक्रारी आणि आक्षेपांच्या पार्श्वभूमीवर आतापर्यंत ५१ ग्रामपंचायतींचे प्रशासक बदलले आहेत.
वैजापुरात सर्वाधिक ‘राजकीय’ धुसफूस
भाजपचे जिल्हा परिषदेचे अध्यक्ष अविनाश गलांडे आणि वैजापूरचे शिवसेना आमदार प्रा. रमेश बोरणारे यांच्यातील राजकीय संघर्षाचे पडसाद ग्रामपंचायतींच्या प्रशासक नियुक्त्यांवरही उमटल्याचे चित्र आहे. जिल्ह्यातील सर्वाधिक हरकती वैजापूर तालुक्यातून आल्या असून, आतापर्यंत १८ प्रशासक बदलल्याचे विश्वसनीय सूत्रांनी सांगितले.
प्रशासनापुढे पेच, जिल्हाधिकाऱ्यांना पत्र
अजूनही प्रशासक बदलण्यासाठी राजकीय शिफारशी आणि पत्र येतच आहेत. मात्र, सध्या विधान परिषद निवडणुकीची आचारसंहिता असल्याने आधी नियुक्त केलेले प्रशासक बदलता येतील का? याबाबत संभ्रम आहे. त्यामुळे प्रशासक बदलण्यासंदर्भात मार्गदर्शन करावे, अशी मागणी करणारे पत्र जिल्हा परिषद प्रशासनाने जिल्हाधिकाऱ्यांना पाठवल्याचेही सूत्रांनी नमूद केले.