Supreme Court Shiv Sena Case: राज्याच्या सत्तासंघर्षाचा सस्पेन्स कायम; धनुष्यबाण ठाकरे की शिंदेंचा, अंतिम फैसला कधी? सर्वोच्च न्यायालयातून मोठी अपडेट

New Dehli News : सुप्रीम कोर्टात गेल्या महिनाभरापासून शिवसेना पक्ष अन् धनुष्यबाणाच्या चिन्हाबाबत सुनावणी सुरु आहे. मंगळवारी दुपारी दोन वाजल्यानंतर या प्रकरणाची सुनावणी घेण्याचे अपेक्षित होते, मात्र दुसऱ्या एका महत्त्वाच्या प्रकरणामुळे या सुनावणीला वेळ मिळाला नाही. बुधवारी या प्रकरणाची सुनावणी होईल असे वाटत असताना झाली नाही. त्यामुळे शिवसेना पक्ष आणि चिन्हाचे प्रकरण बुधवारी युक्तिवादासाठी आले नाही. या आठवड्यात सुनावणी होण्याची शक्यता कमी असून, सुनावणीसाठी आता पुढच्या आठवड्याची वाट पाहावी लागणार आहे.

सुप्रीम कोर्टात शिवसेना पक्ष अन् धनुष्यबाणाच्या चिन्हाबाबत सुरुवातीला उद्धव ठाकरे यांच्या पक्षाची बाजू ज्येष्ठ वकील कपिल सिब्बल यांनी प्रभावीपणे मांडली. त्यानंतर गेल्या दोन आठवड्यापासून एकनाथ शिंदे यांच्या पक्षाची बाजू नीरज कौल हे मांडत आहेत. गेल्या काही दिवसापासून सुरु असलेल्या सुनावणीमुळे लवकरच निर्णय लागण्याची शक्यता वर्तवली जात असतानाच गेल्या दोन दिवसापासून हे प्रकरण सुनावणीसाठी आले नाही. त्यामुळे अंतिम फैसलाही पुढे जाण्याची शक्यता आहे.

गेल्या दोन दिवसापासून सुप्रीम कोर्टात आणखी एक महत्त्वाच्या प्रकरणावर सुनावणी सुरु आहे. त्यामुळे शिवसेना पक्ष आणि चिन्ह प्रकरणाच्या सुनावणीला वेळ मिळाला नाही. मिळालेल्या माहितीनुसार, यूपीएससी संबंधित मॅटर सरन्यायाधीशांच्या खंडपीठासमोर दोन तास सुरू होते. त्यामुळे शिवसेना पक्ष आणि चिन्हाचे प्रकरण बुधवारी युक्तिवादासाठी आले नाही. उद्याही याच यूपीएससी प्रकरणावर सुनावणी होण्याची शक्यता असल्याने, शिवसेना प्रकरणाची सुनावणी उद्याही होईल की नाही याबाबत अनिश्चितता आहे.

त्यामुळे आता सर्वोच्च न्यायालय लवकरच या प्रकरणासाठी नवीन तारीख देणार आहे. या आठवड्यात सुनावणी होण्याची शक्यता कमी असून, पक्षचिन्ह प्रकरणाच्या सुनावणीसाठी आता पुढच्या आठवड्याची वाट पाहावी लागू शकते, अशी माहिती प्रमोद जगताप यांनी दिली. या आठवड्यात सुनावणी झाली नसल्याने आता निकाल लांबणीवर पडणार आहे. त्यामुळे आता दोन्ही गोटात धाकधूक वाढली आहे.