Dharashiv-Kalamb Assembly Constituency 2024 : शेतकऱ्यांच्या मुळावर उठलेले सरकार हटवा, आम्ही तुमचे जीवनमान उंचावू!

Maharashtra Assembly Election 2024 : यंदाची निवडणुक महत्वची आणि महाराष्ट्राचं भवितव्य ठरवणारी आहे. शेतकऱ्यांच्या मुळावर उठलेले महायुतीचे सरकार हटवण्यासाठी प्रत्येकांने शिवसेना उद्धव बाळासाहेब ठाकरे पक्ष आणि महाविकास आघाडीच्या पाठिशी खंबीरपणे उभे राहिले पाहिजे, असे आवाहन धाराशीव-कळंब मतदारसंघाचे शिवसेना उद्धव बाळासाहेब ठाकरे पक्षाचे उमेदवार कैलास पाटील यांनी केले.

पहिल्या अडीच वर्षांमध्ये महाविकास आघाडीचे सरकार सत्तेवर होते. परंतु, त्यातील दोन वर्षे कोविडच्या संकटात गेली. (Kailas Patil) त्यामुळे आम्हाला फक्त सहा महिनेच काम करण्याची संधी मिळाली. मात्र, त्या कालावधीत देखील आम्ही शेतकऱ्यांसाठी अनेक महत्त्वाचे निर्णय घेतले होते. त्यानंतर सत्तेवर आलेले महायुती सरकार हे शेतकऱ्यांच्या मुळावर उठलेले आहे. या सरकारने शेतकऱ्यांचे हित बाजूला ठेवून केवळ राजकीय फायद्यासाठी धोरणे आखली आहेत.

महायुती सरकारने केलेली वचनबद्धता फोल ठरली आहे. शेतकऱ्यांना वीजपुरवठ्याच्या समस्येत अडकवले आहे. हमीभावाच्या नावाखाली शेतमालाची विक्री ठप्प झाली आहे. आणि पिकविम्याचे पैसे अद्याप मिळालेले नाहीत, असा आरोप कैलास पाटील यांनी आपल्या भाषणात केला. या सरकारने शेतकऱ्यांच्या कर्जमाफीच्या फसव्या घोषणा केल्या. मात्र, प्रत्यक्षात त्याचा काहीच उपयोग झाला नाही.

सततच्या नापिकीमुळे शेतकऱ्यांची आर्थिक परिस्थिती बिकट झाली आहे, सरकारकडून मात्र शेतकऱ्यांना आधार मिळाला नाही. (Dharashiv) महाविकास आघाडीला पुन्हा सत्तेची संधी दिल्यास, आम्ही शेतकऱ्यांच्या सर्व समस्या सोडवण्यासाठी ठोस उपाययोजना करू, पिकविमा योजना पुन्हा सक्षमपणे राबवू, असे आश्वासन पाटील यांनी यावेळी दिले.

शेतमालाला चांगला दर मिळवून देऊ आणि वीजपुरवठ्याच्या प्रश्नांवर कायमस्वरूपी तोडगा काढू. वाठवडा गावातील समस्यांवर विशेष लक्ष देत शेतकऱ्यांना हक्काचे जीवनमान उभे करून देण्याचा आमचा प्रयत्न असेल, असेही ते म्हणाले.