Maratha Reservation : जरांगे-पाटलांची प्रकृती ढासळली; डॉक्टरही चिंतेत

Antarwali Sarati Jalna News :

मराठा आरक्षणासाठी पुन्हा उपोषणाला बसलेल्या मनोज जरांगे-पाटील यांची प्रकृती खालावली आहे. जरांगे-पाटील यांच्या नाकातून रक्तस्त्राव झाला असून त्यांना बोलताही येत नाही. त्यांची प्रकृती ढासळळ्याने डॉक्टरही चिंतेत आहेत. गंभीर बाब म्हणजे त्यांना उपचार करून घेण्यास ठाम नकार दिला आहे.

मराठा आरक्षणाचा लढा लढणारे मनोज जरांगे-पाटील यांनी 10 फेब्रुवारीपासून पुन्हा एकदा उपोषणास्र काढले आहे. त्यामुळे सरकारचीही चिंता वाढली आहे. (Indefinite Hunger Strike)

मराठा आरक्षणासाठी (Maratha Reservation) मनोज जरांगे-पाटील यांनी जालना जिल्ह्यातील अंतरवाली सराटी गावात बेमुदत उपोषण सुरू केले आहे. सरकारने सगेसोयरे या शब्दासाठी अधिसूचना काढली आहे. मात्र, या अधिसूचनेचे कायद्यात रुपांतर होईपर्यंत उपोषण सुरूच ठेवण्याचा निर्धार जरांगे-पाटील यांनी केला आहे.

दरम्यान, उपोषणाचा जरांगे-पाटील (Manoj Jarange Patil) यांचा आजचा पाचवा दिवस आहे. चार दिवसांच्या उपोषणाने त्यांची प्रकृती खालावली आहे. त्यांनी अन्नपाणी-औषध व्यर्ज केले आहे. अशातच त्यांच्या नाकातून रक्तस्राव झाल्यामुळे डॉक्टरही चिंतीत आहेत.

जरांगे-पाटील यांनी उपोषण मागे घ्यावे यासाठी प्रशासकीय अधिकाऱ्यांनी त्यांची समजूत काढण्याचा प्रयत्न केला. पण त्यांना यश आले नाही. जरांगे-पाटील यांनी आता कुठलीही तडजोड नाही, आधी मागण्या पूर्ण करा अन् मगच माझ्याकडे या, अशी ठाम भूमिका घेतली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मुख्यमंत्र्यांकडून मराठ्यांची फसवणूक

मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस (Devendra Fadnavis) हे मराठा समाजाची फसवणूक करत असल्याचा आरोपही जरांगे-पाटील यांनी केला आहे. 15 फेब्रुवारीला होणारे अधिवेशन 20 फेब्रुवारीपर्यंत पुढे ढकलल्याने जरांगे-पाटील यांनी नाराजी व्यक्त केली आहे. अधिसूचनेची अंमलबजावणी केल्याशिवाय पाणीही न पिण्याचा निश्चय त्यांनी केला आहे.

(Edited by Avinash Chandane)