Manoj Jarange : मनोज जरांगेंचे उपोषण स्थगित; काय आहे पुढचा प्लॅन?

Maharashtra Political News : लोकसभा निवडणुकीची आचारसंहिता संपताच मराठा आरक्षणासाठी आंदोलक मनोज जरांगे पाटील यांनी पुन्हा आपल्या मागण्यांसाठी उपोषण सुरू केले होते. सगेसोयऱ्यांची अमंलबजावणी करण्यासाठी त्यांनी जालन्यातील अंतरवाली सराटी येथे पुन्हा आंदोलन सुरू केले होते. मात्र मंत्री शंभुराज देसाई Shambhuraj Desai यांची शिष्टाईने जरांगेंनी सहाव्या दिवशी आपले उपोषण स्थगित केले. यामुळे सरकारला दिलासा मिळाल्याची चर्चा आहे.

उपोषण सुरू केल्यापासून जरांगे पाटलांची Manoj Jarange मनधरणी करण्यासाठी सरकारने हालचाली सुरू केल्या होत्या. उपमुख्यमंत्री देवेंद्र फडणवीस यांनीही सरकार मराठा आरक्षणासाठी गंभीर असल्याचे सांगून जरांगेंना उपोषण थांबवण्याचे आवाहन केले होते. त्यानंतर शंभुराज देसाईंनी गुरुवारी जरांगेंची आंदोलनस्थळी जाऊन भेट घेतली. त्यांनी जरांगे यांच्याकडे एका महिन्याची मुदत मागितली. ती मान्य करत जरागेंनी गुरुवारी उपोषण स्थगित केले आहे.

दरम्यान, जरांगेंनी एक महिना नाही तर 30 जूनचीच मुदत दिली होती. मात्र त्यानंतर त्यांनी महिन्याची मुदत मान्य केली. ही मुदत मान्य करताना जरांगेंनी सरकारला इशाराही दिला आहे. एक महिन्यात मागण्या मान्य झाल्या नाही तर आगामी विधानसभा निवडणुकीच्या रिंगणात उतरणार असल्याचे त्यांनी जाहीर केले. तसेच नाव घेऊन एकाएकाला विधानसभेत पाडणार असल्याचेही जरांगे म्हणाले आहेत.

मराठा-कुणबी एकच आहेत. राज्यात मराठा-कुणबीच्या लाखो नोंदी सापडल्या आहेत. त्यांना कुणबीचे प्रमाणपत्र देण्यात येते. आता त्यांच्या सगेसोयऱ्यांनाही प्रमाणपत्र देण्यात यावे, आंदोलनावेळी मराठ्यांवर दाखल झालेले गुन्हे मागे घेण्यात यावेत, या आपल्या मागण्यांचाही जरांगेंनी पुनरुच्चार केला. या महिन्यात आपल्या मागण्या मान्य झाल्या नाही तर विधानसभा निवडणुकीत सरकारला परिणाम भोगवे लागतील, असा इशारा देत जरांगेंनी आपले उपोषण सहाव्या दिवशी स्थगित केले.