Manoj Jarange Patil : 'जरांगे पाटलांच्या एका वाक्यावर...'; ठाकरेंच्या बड्या नेत्याचा थेट सरकारला गंभीर इशारा,सरकारचे टेन्शन वाढणार!

Maratha Reservation : मराठा आरक्षण आंदोलक मनोज जरांगे पाटील यांचे अकरावे बेमुदत उपोषण अंतरवाली सराटीमध्ये सुरू आहे. सरकारचे शिष्टमंडळ, मंत्री, आमदार, जिल्हाधिकारी, पोलीस अधीक्षक अशा सगळ्यांनी जरांगे पाटील यांची भेट घेऊन त्यांना उपोषण मागे घेण्यासाठी साकडे घातले. पण सरकारवर विश्वास ठेवून पाणी, सलाईन घेतल्यानंतर जरांगे पाटील यांनी पुन्हा ते बंद केले.

दरम्यान, शिवसेना उद्धव बाळसाहेब ठाकरे पक्षाचे नेते आमदार अंबादास दानवे यांनी आज मनोज जरांगे पाटील यांची भेट घेत त्यांच्या उपोषणाला पाठिंबा दर्शवला. सरकारने तातडीने या आंदोलनाची दखल घ्यावी आणि मनोज जरांगे पाटील यांच्या मागण्या मान्य कराव्यात, असे दानवे म्हणाले. माध्यमांनी त्यांना सविस्तर निवदेन करण्यास सांगीतले मात्र आपण यावर बोलणार नाही, असे म्हणत दानवे व्यासपीठावरून निघाले.

परंतु मनोज जरांगे पाटील यांनीच दानवे यांना तुम्ही बोला, असे सांगीतले आणि दानवेंनी सरकारला गंभीर इशारा दिला. सरकारने मनोज जरांगे पाटील यांच्या आंदोलनाची वेळीच दखल घ्यावी, अन्यथा हे आंदोलन हाताबाहेर गेले तर गावागावात लोक रस्त्यावर उतरतील, असा इशारा त्यांनी यावेळी दिला.

मनोज जरांगे पाटील यांच्या मागण्यावर सरकारने जर इच्छाशक्ती ठेवली तर यातून समाजाचे आणि राज्याचेही हित साधले जाईल. या मागण्या मान्य करण्याची आवश्यकता आहे, असे दानवे यांनी म्हटले आहे. दरम्यान, १६ नगरसेवकांच्या अपात्रतेच्या विषयावर विचारले असता मी यावर इथे बोलणार नाही, ही माझी नम्र विनंती आहे.

इथे फक्त मनोजदादा जरांगे यांच्या उपोषणाविषयी बोलण्यासाठी आलो असल्याचे सांगत राजकीय विषय बाहेर बोलू, असे ते म्हणाले. मी मनोजदादांशी दोन-चार विषयांवर बोललो आहे. ते आता सगळ्यांसमोर सांगण्याची गरज नाही, सरकारने संवेदनशीलतेने हा विषय गतीने हाताळावा, असे आवाहन दानवे यांनी यावेळी केले.