MNS : अमित ठाकरेंचा आजपासून दहा दिवस मराठवाड्यात मुक्काम

औरंगाबाद : राज्यात काल मुंबईत झालेल्या दसरा मेळाव्यांची चर्चा सुरू असतानांच मनसे विद्यार्थी सनेचे अध्यक्ष अमित ठाकरे (Amit Thackeray) हे आजपासून दहा दिवसांच्या मराठवाडा दौऱ्यावर येत आहेत. या दहा दिवसांत संपुर्ण मराठवाडा (Marathwada) पिंजून काढत ते विद्यार्थी सेनेची नव्याने बांधणी करणार आहेत. वैयक्तिक भेटीगाठींसह काही प्रवेश सोहळे देखील या दौऱ्यात होणार आहेत.

महाराष्ट्र नवनिर्माण सेनेचे (MNS) नेते आणि विद्यार्थी सेनेचे अध्यक्ष अमित ठाकरे यांच्या दौऱ्यामुळे मनसैनिकांमध्ये उत्साहाचे वातावरण आहे. या दौऱ्यात मराठवाड्यातील प्रत्येक जिल्हा आणि तालुक्यातील पदाधिकाऱ्यांच्या वैयक्तिक भेटीगाठी ते घेणार आहेत. विद्यार्थी सेनेत मोठ्या प्रमाणावर नव्या कार्यकर्त्यांचे प्रवेश देखील होणार आहेत.

महाराष्ट्र नवनिर्माण विद्यार्थी सेनेची पुनर्बांधणीसाठी हा मराठवाडा दौरा असल्याचे मनसेच्या वतीने कळवण्यात आले आहे. राज ठाकरे शिवसेनेत असतांना विद्यार्थी सेनेची स्थापना करण्यात आली होती. राज ठाकरे हेच विद्यार्थी सेनेचे अध्यक्ष देखील होते. त्याकाळात विद्यार्थी सेना प्रचंड सक्रीय होती. शिकलेल्या तरुणांना नोकरीच्या संधी उपलब्ध करून देण्यासाठी राज ठाकरे यांनी शिव उद्योग सेनेची शाखा देखील काढली होती.

बेरोजगार तरूणांचा या नव्या सेनेला चांगला प्रतिसाद देखील मिळत होता. अनेक कंपन्यांमध्ये तेव्हा तरुणांना नोकऱ्या दिल्या जायच्या. परंतु कालांतराने या दोन्ही सेना पुढे बंद झाल्या. राज ठाकरे यांनी शिवसेना सोडल्यानंतर तर विद्यार्थी सेना नावालाच उरली होती.

आदित्य ठाकरे यांनी विद्यार्थी सेनेची पुनर्बांधणीचा प्रयत्न केला, पण तो फारसा यशस्वी ठरला नाही. त्यांनी आपला फोकस युवासेनेवर केंद्रीत केला होता. आता राज ठाकरे यांनी स्थापन केलेल्या विद्यार्थी सेनेला मनसेच्या माध्यमातून पुन्हा उभी करण्याचा प्रयत्न त्यांचे चिरंजीवर अमित ठाकरे हे करू पाहत आहेत.

राज ठाकरे यांच्या मनसेकडे तरुणांचा कल सर्वाधिक असल्यामुळे विद्यार्थी सेनेच्या माध्यमातून महाविद्यालयीन विद्यार्थ्यांची मोठी ताकद मनसेच्या मागे उभी राहू शकते. या हेतूने अमित ठाकरे मैदानात उतरले आहेत. अमित ठाकरे यांच्याकडे तरुण नेतृत्व म्हणून पाहिले जाते. गेल्या काही महिन्यांपासून ते मनसेत सक्रीय झाले आहेत. त्यांच्या मराठवाडा दौऱ्यानंतर मनसे विद्यार्थी सेनेत अमुलाग्र बदल झालेले दिसतील, अशी अपेक्षा व्यक्त केली जात आहे.