Nanded DCC Bank : नांदेड जिल्हा बँकेचा नवा अध्यक्ष सोमवारी ठरणार; कदम, कवळे की मग महिलेला संधी?

Nanded Politics : नांदेड जिल्हा बँकेच्या 23 पैकी 21 जागा जिंकत महायुतीच्या शेतकरी विकास पॅनलने बाजी मारली. त्यानंतर बँकेच्या अध्यक्ष पदावर कोणाची वर्णी लागणार? याची उत्सुकता सगळ्यांना लागली आहे. याचा फैसला आता येत्या सोमवारी म्हणजेच दहा तारखेला होणार आहे.

अध्यक्ष, उपाध्यक्ष निवडीसाठी विशेष सभेचे नियोजन करण्यात आले असून खासदार अशोक चव्हाण अध्यक्ष, उपाध्यक्ष पदासाठी कोणाच्या नावाला पसंती देणार याकडे सगळ्यांच्या नजरा लागल्या आहेत. अशोक चव्हाण समर्थक संचालक बी.आर. कदम, मारोतराव कवळे यांच्या नावाची अध्यक्ष पदासाठी चर्चा आहे. या पैकी एका नावावर अशोक चव्हाण गुरुवारी नांदेडमध्ये आल्यानंतर शिक्कामोर्तब करण्याची शक्यता आहे.

नांदेड जिल्हा बँकेच्या इतिहासात पहिल्यादांच पाच महिला संचालक निवडून आल्या आहेत. त्यामुळे तीस वर्षानंतर अध्यक्ष पदी विराजमान होण्याची संधी महिलेला मिळू शकते, असेही बोलले जाते. यापुर्वी बँकेच्या अध्यक्ष पदावर वंसतराव चव्हाण, भास्कर पाटील खतगावकर यांना संधी मिळाली होती.

नायगाव, बिलोली या दोन तालुक्यांना अध्यक्ष पदाची संधी आधी मिळालेली असल्याने यावेळी अशोक चव्हाण यांच्या कन्या आमदार असलेल्या भोकर तालुक्याकडे अध्यक्ष पद जाईल, असे बोलले जाते. या भागातून निवडून आलेल्या चार संचालकांपैकी सर्वात जेष्ठ असलेले बी.आर कदम यांचे नाव सर्वाधिक चर्चेत आहे. तर उमरी तालुक्याचे मारोतराव कवळे हे ही अध्यक्षपदाचे प्रबळ दावेदार मानले जात आहेत.

महिला संचालकाला लॉटरी लागणार?

संचालक मंडळामध्ये प्रथमच महिला संचालकांची संख्या पाच आहे. पैकी चार महिला संचालक या अशोक चव्हाण यांच्या समर्थक आहेत. अध्यक्ष पदासाठी अनुभव, ज्येष्ठतेचा विचार केला तर कदम, कवळे यापैकी एका नावावर शिक्कामोर्तब होऊ शकते.

महिला संचालकाला संधी देण्याचा विचार झाला तर चव्हाण समर्थक संचालकांची लॉटरी लागू शकते. अध्यक्ष पदावर संधी मिळाली नाही, तर उपाध्यक्ष पद महायुतीतील मित्र पक्षाला मिळावे यासाठी काँग्रेस, राष्ट्रवादी आग्रही असणार आहे.