Mahadev Munde : गळा चिरला, मानेसह हातावर 16 वार...; महादेव मुंडेंच्या पोस्टमार्टम रिपोर्टमधून अंगावर काटा आणणारी माहिती आली समोर

Mahadev Munde Postmortem Report : परळीमधील महादेव मुंडे यांच्या हत्येला 20 महिने उलटून गेले तरीही अद्याप या प्रकरणातील एकाही आरोपीला अटक करण्यात आलेली नाही. ही हत्या नेमकी कोणी केली याचा तपास पोलिसांकडून सुरू आहेत.

अशातच आता मुंडे यांचा पोस्टमार्टम रिपोर्ट समोर आला आहे. यामध्ये गुन्हेगारांनी अत्यंत क्रूरपणे त्यांची हत्या केल्याचं स्पष्ट होत आहे. महादेव मुंडे यांच्या हत्या प्रकरणी पोलिसांकडून कारवाईला दिरंगाई होत असल्याचा आरोप करत मृत महादेव मुंडेंच्या पत्नी ज्ञानेश्वरी मुंडे यांनी नुकतंच आत्महत्येचा प्रयत्न केला होता.

या प्रकरणाचा तपास लवकर नाही केला तर पुन्हा आत्महत्येचा प्रयत्न करण्याचा इशारा त्यांनी पोलीस आणि सरकारला दिला आहे. तसंच धनंजय मुंडे यांच्या बंगल्यावरून वाल्मिक कराडने फोन केला आणि या प्रकरणाता तपास थांबवल्याचा गंभीर आरोप देखील ज्ञानेश्वरी मुंडे केला आहे.

यानंतर पोलिसांनी या प्रकरणाची कसून चौकशी सुरू केली आहे. अशातच मुंडेंचा पोस्टमार्टम रिपोर्ट समोर आला आहे. या रिपोर्टनुसार, हल्लेखोरांनी मुंडेंची हत्या करण्यापूर्वी त्यांचा गळा चिरला, श्वसन नलिका कापल्याचं स्पष्ट होत आहे.

शिवाय मुख्य रक्तवाहिन्या देखील कापल्या होत्या. त्यांच्या तोंडावर, मानेवर आणि हातासह इतर ठिकाणी 16 वार करण्यात आले होते. मृत्यूनंतर त्यांचं शरीर पूर्णपणे रक्ताने माखलं होतं.

पोस्टमार्टम रिपोर्टमध्ये नेमकं काय?

महादेव मुंडेंचा पोस्टमार्टम रिपोर्टमध्ये त्यांच्या अंगावर 16 ठिकाणी गंभीर वार केल्याचं उघडकीस आलं आहे. हल्लेखोरांनी सर्वात आधी त्यांचा गळा चिरला यामधील एक वार हा वीस सेमीपर्यंत लांब आणि आठ सेमी रूंद असून तो 3 सेमी खोल आहे.

स्वत:चा बचाव करण्यासाठी मुंडेंनी जेव्हा प्रतिकार केला तेव्हा त्यांच्या हाताला जखमा झाल्याचं रिपोर्टमध्ये नमुद करण्यात आलं आहे. दरम्यान, अतिरक्तस्राव झाल्याने शॉकमध्ये जाऊन मुंडे यांचा मृत्यू झाल्याचा शवविच्छेदन अहवाल डॉक्टरांनी परळी शहर पोलिसांना दिला होता.